لندن …متحدہ قومی موومنٹ کے قائد الطاف حسین نے کہا ہے کہ عسکری قیادت اور وفاقی حکومت کو چاہیے کہ وہ پاکستان کے عوام سے اپیل کریں کہ وہ ان کے ساتھ مل کر ملک کودہشت گردوں سے نجات دلانے کیلئے کام کریں،ایم کیوایم اس سلسلے میں رضاکارانہ طور پر مسلح افواج اور حکومت کو اپنا غیرمشروط تعاون پیش کرتی ہے ۔ صحافی برادری خود کو ہرگز تنہا نہ سمجھے ، ایم کیوایم کے کارکنان صحافی برادری کے ساتھ ہیں۔ یہ بات انہوں نے پیر کی شب ایک نجی ٹی وی کوخصوصی انٹرویو دیتے ہوئے کہی ۔ الطاف حسین نے کراچی کے علاقے قیوم آباد میں نجی ٹی وی اور اخبارات کے دفاتر پر دہشت گردوں کے حملوں کی سخت ترین الفاظ میں مذمت کی اور حملے میں زخمی ہونے والے سیکوریٹی گارڈز کی جلد ومکمل صحت یابی کیلئے دعا کی ،انھوں نے کہاکہ ایم کیوایم ، آزادی صحافت پر یقین رکھتی ہے ، آزادی صحافت کیلئے پوری صحافی برداری کے ساتھ ہے ۔ انہوں نے کہاکہ سچ لکھنے اور سچ بولنے کا خراج ادا کرنا ہی پڑتا ہے لہٰذا میری تمام صحافی برادری سے اپیل ہے کہ وہ اپنا خیال رکھیں اورچوکس رہیں۔ شہریوں کی جان ومال کا تحفظ کرنا حکومت اور انتظامیہ کا فرض ہے ،اگر ناکام رہے تو ایسی حکومت کورضاکارانہ طورپر مستعفی ہوجاناچاہیے اور انتظامیہ کو تبدیل کرکے میرٹ کی بنیاد پر فرض شناس افسران کو تعینات کرنا چاہیے ۔ انہوں نے کہاکہ بدقسمتی سے پاکستان میں میرٹ کا تصور ختم کردیا گیا ہے ۔رشوت ، سفارش اور کرپشن کی وجہ سے ہم دہشت گردوں کے حوالہ سے کوئی واضح پالیسی بنانے سے قاصر ہیں اور دہشت گردوں سے مذاکرات کی رٹ لگائے ہوئے ہیں جبکہ پاکستان کی فوج اور عسکری ادارے اپنی جانوں کے نذرانے بھی پیش کررہے ہیں۔ الطاف حسین نے کہاکہ اب ہمت اور حوصلے سے کام لینے کا وقت ہے، خدانخواستہ ایسا نہ ہوکہ دہشت گردوں کے ہاتھوں ملک کا کوئی اخباراور ٹی وی چینل محفوظ نہ رہے اور پورے ملک پر انتہا پسند دہشت گردوں کا قبضہ ہوجائے۔ انہوں نے دعا کی کہ اللہ تعالیٰ پاکستان اور اس کے عوام کو دہشت گردوں سے نجات دلائے ۔(آمین)۔