لندن…ایم کیو ایم کے قائد الطاف حسین نے کہا کہ وہ ایک سچے اور محب وطن پاکستانی کی حیثیت سے اپنے ضمیر کے مطابق اپنا فرض ادا کرتے ہوئے سابق صدر پرویز مشرف کے حوالے سے آئین وقانون کی پاسداری اوراصول کی بات کررہے ہیں ۔انہوں نے یہ بات سابق صدر اور سابق چیف آف آرمی اسٹاف جنرل پرویز مشرف کے وکیل اور اے پی ایم ایل کے رہنما احمد رضا قصوری سے ٹیلی فون پر گفتگو کرتے ہوئے کہی۔احمدرضاقصوری نے الطاف حسین کوفون کرکے جنرل پرویزمشرف کی کھل کرحمایت کرنے پرسابق صدرپرویزمشرف اوراے پی ایم ایل کی جانب سے ان کا خصوصی شکریہ اداکیا اورکہاکہ اس مشکل وقت میں آپ نے جس طرح سابق صدرپرویزمشرف کی حمایت کی ہے اس سے ہمیں بہت سہارا ملا ہے۔انہوں نے ایم کیوایم کے ارکان کی جانب سے بڑی تعدادمیں اسپتال پہنچنے اور گلدستوں کے ذریعے اپنے نیک جذبات کا اظہار کرنے پر بھی شکریہ اداکیا۔ الطاف حسین نے احمدرضاقصوری سے گفتگوکر تے ہوئے کہا کہ میں نے کسی پر کوئی احسان نہیں کیابلکہ ایک پاکستانی کی حیثیت سے اپنے ضمیرکے مطابق اپنافرض ادا کررہا ہوں ۔ غداری کے مقدمہ کے حوالے سے انہوں نے کہاکہ اگرجنرل پرویز مشرف غدار ہیں تو ان کا ساتھ دینے والے اور ان کے ہاتھوں حلف اٹھانے والے تمام افراد خواہ وہ سابق وزیراعظم ہوں ، وفاقی وزراء ہوں ، چیف جسٹس ہوں یا ججز ہوں وہ بھی غداری کے زمرے میں آتے ہیں لہٰذاان کے خلاف بھی غداری کامقدمہ چلنا چاہیے۔ احمد رضا قصوری نے ان کے اس موٴقف کی مکمل تائید کرتے ہوئے کہاکہ یہ امرانتہائی افسوسناک ہے کہ جس نے پاک فوج میں برسوں تک خدمات انجام دیں، آرمی چیف کی حیثیت سے پاک فوج کی قیادت اور صدرمملکت کی حیثیت سے پاکستان کی خدمت کی اس شخصیت کوغدارقراردیاجارہاہے ۔اگروہ غدار ہیں توپھرمحب وطن کون ہے ، جس ملک کے سپہ سالار کو غدار قرار دیاجائے تواس ملک کادفاع کون کرے گا؟ ۔ جنرل پرویزمشرف کے خلاف آرٹیکل 6کے تحت 12اکتوبر 1999ء سے مقدمہ چلانے سے اسلئے گریزکیاجارہاہے کیونکہ اس کی زد میں ان کے ساتھ شریک لوگ اورپی سی او کے تحت حلف اٹھانے والے ججز بھی آتے ہیں ۔ احمد رضا قصوری نے غداری کے مقدمہ کے حوالے سے الطاف حسین کی جانب سے اٹھائے گئے نکات کوبھی بالکل درست اورلاجواب قراردیا،ان کیلئے نیک جذبات کااظہارکیااوران کی صحت وتندرستی کی دعا کی۔