17 جنوری ، 2014 
الطاف حسین کاسیدنا برہان الدین کے انتقال پر گہرے رنج وغم کااظہار
17 جنوری ، 2014
لندن…متحدہ قومی موومنٹ کے قائدالطاف حسین نے داوٴدی بوہرہ جماعت کے روحانی پیشوا پیرسیدنا برہان الدین کے انتقال پر دلی صدمہ اورگہرے رنج وغم کااظہارکیاہے ۔ تعزیتی بیان میں الطاف حسین نے کہاکہ پیرسیدنا برہان الدین نے پوری زندگی امن، بھائی چارے اوراحترام انسانیت کاپیغام دیا ، اپنی زندگی کا ایک ایک لمحہ انہوں نے اسی پیغام کیلئے گزاراورانسانیت کی بہت خدمت کی۔ انہوں نے کہا کہ اگرچہ وہ بوہری کمیونٹی کے روحانی پیشوا تھے لیکن امن اوراحترام انسانیت کیلئے ان کی جو خدمات ہیں اس کی وجہ سے وہ صرف بوہری کمیونٹی ہی میں نہیں بلکہ تمام برادریوں اور طبقوں میں بہت عزت واحترام کی نظرسے دیکھے جاتے تھے اورہم سب بھی ان کا بہت احترام کیاکرتے تھے۔ انہوں نے مزیدکہاکہ سیدنابرہان الدین صرف بوہری کمیونٹی ہی کے لئے نہیں بلکہ ہرامن پسندانسان کیلئے مشعل راہ تھے۔ الطاف حسین نے کہاکہ ایم کیوایم پیرسیدنا برہان الدین کے انتقال پردکھ او رصدمہ کی اس گھڑی میں بوہری کمیونٹی کے غم میں برابرکی شریک ہے ۔
