لندن…متحدہ قومی موومنٹ کے قائد الطاف حسین نے حق پرست اراکین پارلیمنٹ کو ہدایت کی ہے کہ وہ آئینی ترمیم کے ذریعہ دہری شہریت کے قانون کو ختم کرنے کیلئے فوری اقدامات کریں اوردہری شہریت کے حامل پاکستانیوں کو الیکشن میں حصہ لینے کا حق دلانے کیلئے اپنا بھرپورکردارادا کریں ۔ یہ بات انہوں نے جمعرات کو ایم کیوایم کی رابطہ کمیٹی لندن اور پاکستان کے ارکان کے مشترکہ اجلاس سے بیک وقت ٹیلی فون پر خطاب کرتے ہوئے کہی۔ اجلاس میں پاکستان کی ترقی وخوشحالی کیلئے بیرون ملک مقیم پاکستانیوں کے کردار، ملک کی مجموعی معاشی صورتحال ،مہنگائی ،بے روزگاری ،غربت کی مجموعی رفتار میں اضافے اور حکومت اور طالبان کے مابین ہونے والے مذاکرات پر تفصیلی بات چیت کے علاوہ تھر اور چولستان میں قحط کی صورتحال، غذائی قلت اور طبی امداد کی عدم فراہمی کے باعث بچوں کی ہلاکتوں اورقحط زدہ علاقوں کی ناگفتہ بہ صورتحال پر بھی تبادلہ خیال کیا گیا ۔ الطاف حسین نے کہاکہ بیرون ملک مقیم پاکستانی ہرماہ باقاعدگی سے خطیر زرمبادلہ پاکستان بھیجتے ہیں،ہرقدرتی اور ناگہانی آفات کے موقع پر اربوں روپے امداد دیتے ہیں اور بیرون ملک ، پاکستان کا وقاربلند کرنے اور اس کے مفادات کے تحفظ کیلئے ہمہ وقت تیار رہتے ہیں انہیں پاکستانی سیاست میں حصہ لینے سے روکنے کا عمل انتہائی غیرمنصفانہ ہے ۔ دہری شہریت کے حامل پاکستانیوں کو سیاست میں حصہ لینے سے روکنا سراسر ظلم ہے اور اس آئینی پابندی کو آئینی ترمیم کے ذریعہ ختم کرنا نہ صرف محب وطن اوورسیز پاکستانیوں بلکہ پوری قوم کا مطالبہ ہے۔انہوں نے حق پرست اراکین پارلیمنٹ کو ہدایت کی کہ وہ دہری شہریت کے قانون کو ختم کرنے کیلئے فوری اقدامات کریں اور اس ضمن میں حکومت اور دیگر جماعتوں سے بھی رابطہ کریں،انھوں نے حکومت سے مطالبہ کیا کہ پاکستان میں خط غربت سے نیچے زندگی گزارنے والے افراد کو دووقت کی باعزت روٹی فراہم کرنے ،ملک سے غربت ، مہنگائی اور بے روزگاری کے خاتمے کیلئے عملی اقدامات کیے جائیں ۔ تھراور چولستان میں ملک بھر سے ڈاکٹروں اور پیرامیڈیکل اسٹاف بمعہ ادویات اور کیمپس بھیجے جائیں اور دیگر مسائل کے حل کے ساتھ ساتھ تھر اورچولستان کے مفلوک الحال افرادکی ہرممکن خبرگیری بھی کی جائے ۔انہوں نے بیرون ملک مقیم پاکستانیوں سے پرزوراپیل کی کہ وہ ملک کے معاشی استحکام اور اپنے مفلوک الحال پاکستانیوں کی امداد کیلئے زیادہ سے زیادہ عطیات پاکستان بھیجیں ۔