کراچی…متحدہ قومی موومنٹ کی رابطہ کمیٹی کا ہنگامی اجلاس ایم کیوایم کے مرکز نائن زیروعزیزآباد میں ہوا جس میں کراچی کے مختلف علاقوں میں سادہ لباس میں ملبوس اہلکاروں کے ہاتھوں کارکنان کی مسلسل گرفتاریوں اوراردوبولنے والے پروفیشنلز کے قتل کے واقعات پرگہری تشویش کا اظہارکیا گیا۔اجلاس میں سادہ لباس میں ملبوس پولیس اہلکاروں کے ہاتھوں ایم کیوایم کے بے گناہ کارکنان کی گرفتاریوں کے مسلسل واقعات ، حراست کے دوران ان پر وحشیانہ تشدد اور رہائی کے عوض بھاری رشوت کے مطالبے کو غیرآئینی اورغیرقانونی قراردیا گیا۔ رابطہ کمیٹی نے کہاکہ ڈبل کیبن گاڑیوں میں سوار سی آئی ڈی اورپولیس کے دیگر اداروں کے ڈیتھ اسکواڈکے اہلکارسادہ لباس میں نقاب پہن کر بے گناہ کارکنان اور ہمدرد شہریوں کو گرفتارکررہے ہیں،گرفتارشدگان کے اہل خانہ کو کچھ نہیں بتایاجاتا کہ گرفتارشدگان کس کی تحویل میں ہیں،دوران حراست انھیں بہیمانہ تشدد کا نشانہ بنانے کے علاوہ رہائی کیلئے ان کے اہل خانہ سے کروڑوں روپے طلب کیے جارہے ہیں۔اجلاس میں بتایا گیا کہ گزشتہ 48 گھنٹوں میں چھ کارکنان وہمدردوں کو گرفتارکرکے لاپتہ کردیاگیاہے جن میں اسکیم 33 کے کارکنان علی حیدرولد محمد یوسف، سمید ولد انیس، سلمان ولد مشتاق قریشی، شعیب ولد محمد اصغر، یونٹ68 گلشن اقبال سیکٹر کے کارکن فیضان ولد قمرالدین اور نارتھ ناظم آباد یونٹ73 کے انچارج خلیل کے بھائی ضیاء الرحمان شامل ہیں جبکہ اس سے قبل متعدد کارکنان کو گرفتارکرکے لاپتہ کردیا گیا ۔ کراچی میں ایک منظم سازش کے تحت اردوبولنے والے پروفیشنلز کو چن چن کرقتل کیا جارہا ہے اورگزشتہ پانچ روز میں تین ڈاکٹرز، دوپروفیسرز اوروکلاء کو قتل کیاجاچکا ہے۔ایسا محسوس ہوتا ہے کہ حکومت نے کراچی کے عوام کو سفاک پولیس اہلکاروں اور دہشت گردوں کے رحم وکرم پرچھوڑدیا ہے جس کی جتنی بھی مذمت کی جائے کم ہے ۔ اجلاس میں کہا گیا کہ ایم کیوایم ، کراچی کے عوام کی منتخب جماعت ہے اور کراچی میں قیام امن کیلئے حکومت وانتظامیہ کے ظالمانہ اقدامات پر خون کے گھونٹ پی کر صبروتحمل کا مظاہرہ کرتی رہی ہے تاہم قومی معیشت میں اہم کردارادا کرنے والے شہرکراچی اوراس کے پرامن شہریوں کو خونی اوربے رحم بھیڑیوں کے رحم وکرم پر نہیں چھوڑا نہیں جاسکتا ۔ اجلاس میں متفقہ طورپر فیصلہ کیا گیا کہ سی آئی ڈی اور پولیس کے دیگر اہلکاروں کے غیرقانونی اقدامات ، اردوبولنے والے پروفیشنلز کے بہیمانہ قتل کے واقعات پر قانونی کارروائی اورپرامن احتجاج کا حق رکھتی ہے ۔ اگر کراچی میں بے گناہ شہریوں کے قتل اورقاتلوں کے بجائے محکمہ پولیس میں شامل ڈیتھ اسکواڈ کے اہلکاروں کے ہاتھوں ایم کیوایم کے بے گناہ کارکنان وہمدردوں کی غیرقانونی گرفتاریوں کا سلسلہ بند نہ کیا گیا تو ایم کیوایم اس ظلم کے خلاف بھرپور احتجاج کرے گی۔اجلاس میں سپریم کورٹ کے چیف جسٹس، جسٹس تصدق حسین جیلانی سے اپیل کی گئی کہ کراچی میں سادہ لباس اہلکاروں کی ڈاکووٴں کے انداز میں غیرقانونی کارروائیوں کے خلاف ازخود نوٹس لیاجائے ۔