کراچی …متحدہ قومی موومنٹ کے لیبر ڈویژ ن کے انچارج کاظم رضا نے ملک بھر کے محروم و مظلوم مزدوروں سے اپیل کی ہے کہ وہ ایم کیوایم کی جانب سے اتوار25مئی کو الطاف حسین سے اظہار یکجہتی کے لئے تبت سینٹر پرنکالی جانے والی عظیم الشان ریلی میں بھر پور تعداد میں شرکت کرکے ریلی کو کامیاب بنائیں ۔کاظم رضا نے کہا کہ الطاف حسین نے ہمیشہ ملک غریب و مظلوم طبقات کے حقوق کے حصول کی جدو جہد کی ہے اور بالخصوص مزدوروں کے ساتھ ہونے والی ہر نا انصافی کے خلاف آواز بلند کی ہے ۔انہوں نے مزدور یونینز کے ذمہ داران اور لیبر ڈویژن کے ذمہ دارا ن وکارکنان سے کہا ہے کہ وہ اپنے مزدوربھائیوں کے درمیان جاکر انھیں الطاف حسین کے خلاف ہونے والی عالمی سازشوں کے متعلق آگہی فراہم کریں ، انھیں 25مئی کی اظہار یکجہتی ریلی میں شرکت کی دعوت دیں اور ریلی میں اپنے اہل خانہ ، اہل علاقہ ، دوست احباب کے ہمراہ شرکت کرکے ثابت کردیں کہ الطاف حسین سے اپنی محبت میں ملک کا مظلوم و محروم مزدور طبقہ کسی سے پیچھے نہیں ہے ۔دریں اثناء متحدہ قومی موومنٹ کے شعبہ خواتین کی انچارج کشور زہرہ نے پاکستان بھر کی خواتین سے اپیل کی ہے کہ وہ 25مئی کو الطاف حسین سے اظہار یکجہتی کے لئے تبت سینٹر کراچی میں ایم کیوا یم کے تحت نکالی جانے والی ریلی میں بھر پور تعداد میں شرکت کریں۔کشور زہرہ نے کہاکہ الطاف حسین ملک کے واحد سیاسی رہنما ہیں جو خواتین کے ساتھ ہونے والی زیادتیوں اور انکے حقوق سلب کئے جانے کے خلا ف آواز بلند کرتے رہے ہیں اوریہی وجہ ہے کہ شروع دن سے خواتین ایم کیوایم کی جدوجہدکاحصہ رہی ہے اورآج بھی ایم کیوایم کا خواتین ونگ ملک کی دیگر جماعتوں سے زیادہ فعال اور خواتین کے حقوق کے لیے موثر اندا ز میں کا م کر رہا ہے ۔ اور 25مئی کی اظہار یکجہتی ریلی میں اپنے اہل خانہ کے ہمراہ شرکت کرکے حق پرستی کا ثبوت دیں اور دنیا پر واضح کر دیں کے الطاف حسین کی جانثار بہنیں انکے خلاف کسی ملکی یا بین الاقوامی سازش برداشت نہیں کریں گی۔