کراچی......متحدہ قومی موومنٹ کی رابطہ کمیٹی نے اورنگی ٹائون میں مسلح دہشت گردوں کی فائرنگ سے ایم کیوایم اورنگی ٹائون سیکٹرکے جوائنٹ سرکل انچارج صلاح الدین کے بہیمانہ قتل کی سخت ترین الفاظ میں مذمت کی ہے اور کہا ہے کہ قتل و غارتگری کے اوچھے ہتھکنڈوں کے ذریعے ذمہ داران و کارکنان کو حق پرستانہ جدوجہد سے ہرگز باز نہیں رکھا جاسکتا ۔ ایک بیان میں رابطہ کمیٹی نے کہاکہ ایک جانب کارکنان کے بہیمانہ قتل کا سلسلہ ہے جبکہ دوسری جانب ذمہ داران و کارکنان کے گھروں پر غیر قانونی چھاپے اور گرفتاریوں کا غیر جمہوری عمل بھی جاری ہے ،ایم کیوایم ملک کے دفاع اور استحکام کے ہر معاملے میں ہمیشہ پیش پیش رہی ہے اورایم کیوایم اور اس کے کارکنان کے ساتھ ہونے والے غیر منصفانہ ، غیر قانونی ، غیر انسانی اور غیر جمہوری سلوک کو ئی بھی ذی شعور شخص ملک و قوم کے مفاد میں ہرگز قرار نہیں دے سکتا ہے ۔ رابطہ کمیٹی نے صلاح الدین شہید کے تمام سوگوار لواحقین سے دلی تعزیت وہمدردی کااظہارکرتے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ رابطہ کمیٹی نے صدر ممنون حسین ، وزیراعظم نواز شریف ، وزیر داخلہ چوہدری نثار ، گورنر سندھ ڈاکٹر عشرت العباد اور وزیراعلیٰ قائم علی شاہ سے مطالبہ کیا کہ صلاح الدین کے سفاکانہ قتل میں ملوث دہشت گردوں کو فی الفور گرفتار کیاجائے اور انہیں قرار واقعی سزادی جائے ۔دریں اثناایم کیو ایم کے قائد الطاف حسین نے اورنگی ٹائون میں مسلح دہشت گردوں کی فائرنگ سےجوائنٹ سرکل انچارج صلاح الدین کی شہادت پر گہرے دکھ اور افسوس کااظہا رکرتے ہوئے کہاکہ مجھ سمیت تمام کارکنان سوگوار لواحقین کے غم میں برابر کے شریک ہیں ۔انھوں نے دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو صبرجمیل عطا کرے۔ (آمین)