واشنگٹن … امریکی وزیر خارجہ ہیلری کلنٹن چین، بنگلہ دیش اور بھارت کے دورے پر30اپریل کو واشنگٹن سے روانہ ہوں گی۔جمعہ کو امریکی محکمہ خارجہ سے جاری بیان کے مطابق وزیر خارجہ ہلری کلنٹن چین، بنگلہ دیش اور بھارت کے لیے اپنے سہ ملکی دورے پر 30 اپریل کو واشنگٹن سے روانہ ہوں گی۔ امریکی وزیر خارجہ کلنٹن اور وزیر خزانہ ٹموتھی جی گیتھنر3 اور4 مئی کو امریکا اور چین کے درمیان چوتھے اسٹرٹیجک اور اقتصادی مذاکرات کے مشترکہ اجلاس میں شریک ہوں گے ۔ اجلاس میں چین کی نمائندگی نائب وزیر اعظم وانگ کی شان اورا سٹیٹ قونصلر دائی بن گو کریں گے۔جس کے بعدہیلری کلنٹن 5 تا 8 مئی تک بنگلہ دیش اور بھارت کا دورہ کریں گی۔ڈھاکل میں اپنے قیام کے دوران وزیر خارجہ کلنٹن دونوں ممالک کے درمیان سیاسی ، اقتصادی اور سیکیورٹی سے متعلق امور پر تعاون بڑھانے کے لیے بنگلہ دیش حکومت کے سینئر عہدے داروں اور سول سوسائٹی کے نمائندوں سے ملاقات کریں گی،جبکہ کولکتا میں وہ ریاستی عہدے داروں اور عوامی تنظیموں کے نمائندوں سے ملیں گی۔ دارالحکومت دہلی میں وہ سٹرٹیجک شراکت داری کے جائزے اور 13 جون کو واشنگٹن میں ہونے والے امریکہ بھارت اسٹرٹیجک مذاکرات پربھارتی حکومت کے عہدے داروں سے بات چیت کریں گی۔