کراچی......متحدہ قومی موومنٹ کی رابطہ کمیٹی کے رکن سید حیدر عباس رضوی نے کہا کہ کراچی میں جاری پانی کے مصنوعی بحران کیخلاف ایم کیو ایم کی عوامی ریلی کی آواز حکمران سن لیں اب یہ سلسلہ نہیں چلے گا کراچی کی عوام کا حق دینا ہوگا۔ان خیالات کا اظہار انھوں نے کراچی میں پانی کی شدید قلت کے باعث سوک سینٹر پر منعقدہ عوامی احتجاجی مظاہرے کے شرکاء سے اظہار خیال کرتے ہوئے کیا۔اس موقع پر اراکین رابطہ کمیٹی عارف خان ایڈوکیٹ،توصیف خانزادہ،وسیم اختر،سینٹرل ایگزیکٹو کونسل کے اراکین اور حق پرست اراکین اسمبلی سمیت خواتین ،بچے اور بزرگ سمیت عوام کی بڑی تعداد موجود تھی، حیدر عباس رضوی نے کہا K-4منصوبہ آج سے سات سال پہلے شروع ہوجانا چاہئے تھا ۔ دریا ئے سندھ کے پانی پر آبادی کے تناسب سے حق ملکیت تسلیم کیا جائے،دریائے سندھ کے پانی پر پہلا حق کراچی کی عوام کا ہے کیونکہ کراچی کی آبادی باقی ماندہ سندھ کی آبادی سے زیادہ ہے، وفاقی اور صوبائی حکومتیں K-4منصوبہ بناکر ہم پر احسان نہیں کررہے ،ہم بھیک نہیں مانگ رہے آبادی کے لحاظ سے اپنا حق مانگ رہے ہیں جو ہم لیکر رہینگے ۔ پورے ملک کے حکمرانوں کو ووٹ لینے ہوں توکراچی چلے آتے ہیں ،نوٹ لینے ہوں تو کراچی چلے آتے ہیں،کراچی کے وسائل سب کے لئے ہیں لیکن کراچی کے مسائل صرف اور صرف کراچی والوں کے ہیں یہ کیسا تضاد ہے۔انہوں نے کہا کہ ہم ترقیاتی منصونے نہیں مانگ رہے ،عوام کے لئے نوکریاں نہیں مانگ رہے بلکہ پانی مانگ رہے ہیں جو ہمارا بنیادی حق ہے ، آج کراچی ایک ایک بوندپانی کو ترس رہا ہے ۔کراچی شہر میں تین کروڑ آبادی ہے جبکہ صوبہ سندھ میں پانچ کروڑا ٓبادی ہے،کراچی98اعشاریہ پانچ فیصد، صوبہ سندھ کو کماکر دیتا ہے اور باقی ماندہ سندھ صرف1.5فیصد کماتا ہے اس کے باوجودکراچی کے عوام شہر میں پانی کے لئے احتجاج کررہی ہے۔رکن رابطہ کمیٹی عارف خان ایڈوکیٹ نے کہا کہ کراچی کی عوام کو ایک مرتبہ پھر پیچھے دھکیلنے کی سازش کی جارہی ہے ۔وزیر اعلیٰ سندھ بتائیں کہ 20 کروڑ ٹینکر مافیا کو کیوں جاری کئے؟ رکن سندھ اسمبلی سید فیصل سبز واری نے کہا کہ کراچی شہر 70 فیصدریونیو فراہم کرتا ہے اس کے باوجود اسکے جائز حقوق سے بھی اسے محروم رکھا جاتاہے ،وزیر اعظم اور وزیر اعلیٰ صرف باتوں سے کام نہیں چلے گا ۔ ایک جانب 124ارب روپے سے صرف لاہور میں میٹرو بس چلائی جارہی دوسری جانب کراچی کی عوام کے لئے جاری ہونے والے K4منصوبے کے 6ارب نہیں دیے جارہے یہاں سے حکمرانوں کی کراچی دشمنی کا اندازہ ہوتا ہے۔احتجاجی مظاہرے سے حق پرست اراکین اسمبلی مزمل قریشی،ثمن جعفری،اقبال محمدعلی اورمحمودعبدالرزاق نے خطاب میںکہاکہ کراچی پاکستان کا معاشی حب ہے اورسندھ کادارلخلافہ ہے،اس شہرکے عوام کو پانی نہیں مل رہاہے جبکہ واٹرہائیڈریٹس کوپانی فراہم کیاجارہاہے۔انہوںنے مطالبہ کیاکہ کراچی میں پانی کی فراہمی یقینی بنائی جائے اورذمہ دارافرادکے خلاف سخت ترین کارروائی عمل میںلائی جائے۔