کراچی......متحدہ قومی موومنٹ کی رابطہ کمیٹی نے حکومت کی جانب سے پیٹرولیم مصنوعات کی قیمتوں میں اضافے کی سخت ترین الفاظ میں مذمت کی ہے اور مہنگائی کے دور میں پیٹرولیم مصنوعات کی قیمتوں میں اضافے کو غریب عوام پر ظلم قرار دیا ہے ۔ ایک بیان میں رابطہ کمیٹی نے کہاکہ حکومت نے پیٹرولیم مصنوعات کی قیمتوں میں اضافہ کرکے ملک بھر کے عوام پر مہنگائی کا مزید بوجھ لادھ دیا گیا ہے جبکہ ہونا تو یہ چاہئے تھا کہ حکومت اپنے دعوئوں کے مطابق پیٹرولیم مصنوعات کی قیمتوںمیں مزید کمی کرکے عوام کو ریلیف فراہم کرتی لیکن اس کے برعکس حکومت نے پیٹرولیم مصنوعات کی قیمتوں میں اضافہ کردیا جس کے باعث غریب عوام کی کمر ٹوٹ کر رہ گئی ہے اور عوام کو مہنگائی کے دور میں مزید بدحالی ، کسمپرسی کی زندگی بسر کرنے پر مجبور کردیا گیا ہے ، حکومت نے بجٹ سے چند دن پہلے عوام پر ان ڈائریکٹ ٹیکس لگایا ہے جو کہ خود قابل مذمت بات ہے ۔رابطہ کمیٹی نے کہاکہ حکومتی دعوئوں کے برعکس پیٹرولیم مصنوعات کی قیمتوں میں اضافہ سے عوام کو شدید مایوسی کا سامنا ہے اور موجودہ حکومت کی جانب سے اس ضمن میں ریلیف کے دعوے غلط ثابت ہوگئے ہیں ۔ رابطہ کمیٹی نے کہاکہ رمضان المبارک کی آمد قریب ہے اور اس سے قبل ہی پیٹرولیم مصنوعات کی قیمتوں میں اضافہ کرنا سراسر غیر دانشمندانہ اقدام ہے جس سے دیگر اشیائے صرف کی قیمتوں میں بھی بے پنہاں اضافہ ہوگا اور اس سے براہِ راست غریب عوام متاثر ہوں گے ۔ رابطہ کمیٹی نے وزیراعظم نوازشریف سے مطالبہ کیا کہ پیٹرولیم مصنوعات کی قیمتوں میں اضافہ فی الفور واپس لیاجائے اور حکومت اپنے دعوئوں کے مطابق پیٹرولیم مصنوعات کی قیمتوں میں عوام کوزیادہ سے زیادہ ریلیف کی فراہمی کیلئے اقدامات کرے ۔علاوہ ازیں خیبرپختونخواہ میںہونیوالے بلدیاتی انتخابات میںمتحدہ قومی موومنٹ کی جانب سے نامزد کردہ 22حق پرست امید وار کارمیاب ہوئے ہیں ، جن میں چار خواتین بھی شامل ہیں۔واضح رہے کہ ایم کیو ایم کے نامزد کردہ10امید وار پہلے ہی بلامقابلہ منتخب ہوچکے ہیں ۔ حق پرست امید واروں نے کے پی کے، کے مختلف علاقوں سے انتخابات میں حصہ لیا اور شدید مصائب و مشکلات کے باوجود کامیابیاں حا صل کیں۔