کراچی ......متحدہ قومی موومنٹ کی رابطہ کمیٹی نے حکومت کی جانب سے کراچی میں موٹرسائیکل سواروں کیلئے ہیلمٹ پہننے کی لازمی پابندی کاخیرمقدم کرتے ہوئے کہاہے کہ ایم کیوایم، موٹرسائیکل سوارشہریوں کے تحفظ کیلئے ہیلمٹ پہننے کی لازمی پابندی کے قانون کی حمایت کرتی ہے ۔ ایک بیان میں رابطہ کمیٹی نے کہاکہ موٹرسائیکل کے حادثات میں شہریوں کی ہلاکتوں کی شرح سب سے زیادہ ہے اور ملک بھر کا غریب ومتوسط طبقہ سفر کیلئے موٹرسائیکل استعمال کرتا ہے ، موٹرسائیکل سواروں کیلئے ہیلمٹ پہننے کو لازمی قراردینا بلاشبہ حکومت کاایک احسن قدم ہے اور قانون کی پابندی سے ٹریفک حادثات میں قیمتی جانوں کے تحفظ کو یقینی بنایاجاسکتا ہے اس لئے یہ ضروری ہے کہ اس قانون کا اطلاق کراچی کے ساتھ ساتھ پورے ملک میں کیاجائے۔ رابطہ کمیٹی نے کہاکہ وزیراعظم نوازشریف کوچاہیے کہ وہ موٹرسائیکل سواروں کیلئے ہیلمٹ پہننے کی پابندی کا بل قومی اسمبلی اور سینیٹ سے پاس کراکر اسے قانون کی شکل دیں تاکہ یہ قانون پورے ملک میں نافذ کیاجاسکے اور موٹرسائیکل استعمال کرنے والا لازمی ہیلمٹ خریدنے کاپابند ہوسکے۔ رابطہ کمیٹی نے حکومت سندھ سے مطالبہ کیا کہ کراچی کی طرح موٹرسائیکل سواروں پر ہیلمٹ پہننے کی پابندی صوبے کے دیگر شہروں میں بھی عائد کی جائے اور شہریوں کی سہولت کیلئے ہیلمٹ پہننے کی پابندی کی مہلت میں 10 سے 15 روز کااضافہ کیاجائے ۔دریں اثنا حق پرست سینیٹر میاں عتیق نے گزشتہ روز ضلع جھنگ علاقے پولیس لائن میں الطاف حسین کی خصوصی ہدایت پر خدمت خلق فاؤنڈیشن کے تحت غریب خواتین اور بچیوں کی سلائی اور کڑہائی اور دیگرکام میں مہارت کیلئے دو فری سلائی سینٹر کا افتتاح کیا ۔ اس موقع پر ان کے ہمراہ ایم کیو ایم اپر پنجاب کے صدر راجہ اعجاز ، نائب صدر اپر پنجاب و دیگر ذمہ داران بھی موجود تھے ۔اس موقع پر بات چیت کرتے ہوئے سینیٹر میاں عتیق نے کہا کہ ایم کیو ایم غریب اور متوسط طبقے کی جماعت ہے اورالطاف حسین ملک میں غریب و متوسط طبقے کی حکمرانی کیلئے جدوجہد کررہے ہیں ۔انہوں نے کہا کہ ایم کیو ایم آئندہ بلدیاتی انتخابات میں پنجاب کے ہر ضلع سے اپنا امیدوار نامزد کریگی ۔ بعد ازاںانھوں نے ذمہ داران کے ہمراہ تحصیل شورکوٹ ،اٹھاہرہ ہزاری اور احمد پور سیال کا دورہ کیا۔