کراچی … ایم کیوایم کے زیر اہتمام سانحہ 12 مئی 2007ء کے شہداء کی پانچویں برسی انتہائی عقیدت و احترام سے منائی گئی۔ کراچی سے جاری اعلامیے کے مطابق برسی کے سلسلے میں ایم کیو ایم کی جانب سے ملک بھرمیں قائم ایم کیو ایم کے صوبائی، ضلعی، تحصیل اور زونل دفاترمیں قرآن و فاتحہ خوانی کے اجتماعات منعقد ہوئے جن میں 12 مئی کے حق پرست شہداء سمیت تمام شہداء کی ارواح کے ایصال ثواب کیلئے قرآن خوانی و فاتحہ خوانی کی گئی اور شہداء کو خراج عقیدت پیش کیا گیا۔12 مئی کے سلسلے میں مرکزی اجتماع لال قلعہ گراوٴنڈ عزیز آباد میں ہوا جس میں ایم کیو ایم کی رابطہ کمیٹی کے ڈپٹی کنوینرز انیس احمد قائم خانی، سینیٹر نسرین جلیل، اراکین رابطہ کمیٹی سید شعیب احمد بخاری، کنور خالد یونس، شاہد لطیف، جاوید کاظمی، کیف الورایٰ، گلفراز خان خٹک، واسع جلیل، ایم کیو ایم کے رہنماء عامر خان، حق پرست سینیٹرز، اراکین قومی و صوبائی اسمبلی، وزراء، مشیران، ایم کیو ایم کے مختلف شعبہ جات کے ارکان، سیکٹرز و یونٹوں کے ذمہ داران، کارکنان، ہمدردوں اور شہداء کے عزیز و اقارب نے بڑی تعداد میں شرکت کی اور شہدائے 12 مئی کو زبردست خراج عقیدت پیش کیا۔ قبل ازیں مولانا شاہ فیروز الدین رحمانی نے فاتحہ خوانی کرائی اور 14 کارکنان سمیت تمام شہداء کی مغفرت، ان کے درجات کی بلندی، سوگوار لواحقین کے صبر جمیل اور ملک کی بقاء و سلامتی سمیت الطاف حسین کی صحت، تندرستی اور درازی عمر کیلئے دعائیں کیں۔ کراچی کی طرح سندھ کے شہروں حیدر آباد، میرپور خاص، سکھر، نوابشاہ، سانگھڑ، ٹنڈو الہیار، کھوٹکی، عمر کوٹ، جامشورو، ٹھٹھہ، نوشہرو فیروز، بدین، لاڑکانہ، خیرپور، شکار پور، دادو، قمبر شہداد کوٹ، کشمور، جیکب آباد، لاہور، راولپنڈی، ملتان، فیصل آباد، گوجرانوالہ، آزاد کشمیر راولاکورٹ، میرپور، مظفرآباد، باغ، ایبٹ آباد، مانسہرہ، ہری پور، گلگت بلتستان میں بھی برسی کے اجتماعات منعقد کیے گئے، جس میں مقامی ذمہ داران وکارکنان کے علاوہ حق پرست عوام نے بڑی تعداد میں شرکت کی اور شہداء 12 مئی کو زبردست خراج عقیدت پیش کیا۔