کراچی......متحدہ قومی موومنٹ کی رابطہ کمیٹی نے ایم کیوایم کے کارکن آصف علی کو11 مارچ کورینجرزکی فائرنگ سے شہیدہونے والے کارکن وقاص علی شاہ کے بہیمانہ قتل میں ملوث کرنے کی شدیدمذمت کی ہے ۔ اپنے ایک بیان میں رابطہ کمیٹی نے کہاکہ رینجرزنے ایم کیوایم گلستان جوہرسیکٹرکے کارکن آصف علی کو 12مئی کو گرفتار کیا تھاجس کے بعدانہیں ایم کیوایم کے دیگرکارکنوںکی طرح غائب کردیاگیاتھا اورآج ان کی گرفتاری ظاہرکی گئی ہے اورانہیں ایم کیوایم کے جواں سال کارکن وقاص علی شاہ شہیدکی شہادت میں ملوث کردیاگیاہے۔رابطہ کمیٹی نے کہاکہ لوگوںکی بڑی تعداد گواہ ہے کہ کس طرح رینجرز کے اہلکاروںنے 11مارچ کو نائن زیروپر جمع ہونے والے کارکنوں اورہمدردوںکومنتشرکرنے کیلئے لاٹھی چارج کرنے کے ساتھ ساتھ فائرنگ بھی کی تھی۔ایم کیوایم کے ہردلعزیز کارکن وقاص شاہ رینجرزکے اہلکارکی فائرنگ سے شہیدہوئے جس کے گواہ درجنوں افرادہیں۔رینجرزکے اہلکاروں کی فائرنگ کی فوٹیج ٹی وی چینلز پر نشر بھی ہوئی تھی لیکن رینجرز نے ایم کیوایم کے کارکن آصف علی کوہی اس کاقاتل ٹھہرادیاہے جس کی جتنی بھی مذمت کی جائے کم ہے۔ رابطہ کمیٹی نے کہا کہ رینجرزکایہ دعویٰ وقاص شاہ کے قتل میں ملوث رینجرزکے اہلکاروںکو بچانے کی کوشش ہے۔رابطہ کمیٹی نے کہاکہ ایم کیوایم کے کارکن کوملوث کرنے کے بجائے وقاص علی شاہ کے قتل میںملوث اہلکاروںکے خلاف کارروائی کی جائے ۔