کراچی.... رفیق مانگٹ...... بھارتی اخبار”ہندوستان ٹائمز“ کے مطابق گرداسپورحملوں میں استعمال ہونے والی نائٹ وژن ڈیوائس افغانستان میں امریکی فوجیوں کی نکلی،امریکا نے بھی اس ڈیوائس کی ملکیت کی تصدیق کردی۔ اخبار لکھتا ہے کہ حملوں کی جگہ سے تفتیش کاروں کو جو ڈیوائس ملی وہ امریکی فوج کے زیر استعمال ہے جس پر امریکی فوج کی پراپرٹی کے الفاظ لکھے ہوئے ہیں۔ امریکا نے تصدیق کی ہے کہ یقیناً یہ ڈیوائس افغانستان میں امریکی فوجیوں ہی کی ہے لیکن دعویٰ کیا کہ فوجیوں سے افغانستان میں کھو گئی تھی۔رپورٹ کے مطابق بھارت کے ایک اعلیٰ سرکاری عہدے دار نے نام ظاہر نہ کرنے کی شرط پر اخبار کو بتایا کہ امریکا کی طرف سے بھارت کو تصدیق حاصل ہو چکی ہے کہ نائٹ وژن ڈیوائس افغانستان میں امریکی فوج کے زیر استعمال تھی اور وہاں گم ہو گئی تھی۔ اب تفصیلات کے لئے رسمی طور پراس ڈیوائس کے تمام شناختی نشان امریکا کو فراہم کیے گئے ہیں۔بھارتی پنجاب میں گورداسپور کے دہشت گردی حملے میں مبینہ طور پراستعمال ہونے والی نائٹ وژن ڈیوائس امرتسر پٹھان کوٹ ریلوے ٹریک سے ملی جہاں ٹرین کو دھماکے سے اڑانے کےلئے پانچ دھماکا خیز ڈیوائسز(آئی ای ڈیز ) نصب کی گئی تھے ، جو پھٹ نہ سکیں۔ذرائع نے بتایا کہ اگرچہ یہ ڈیوائسزتجارتی لحاظ سے دستیاب ہیں۔تاہم اس ڈیوائس پر امریکی حکومت کی پراپرٹی لکھا ہے اسی وجہ سے بھارتی حکام نے امریکا سے رابطہ کیا ۔ اب سوال پیدا ہوتا ہے کہ گورداسپور حملہ آوروں کے ہاتھ یہ ڈیوائس کیسے آئی۔ اخبار نے الزام تراشی کرتے ہوئے لکھا کہ تفتیش کار اس نتیجے پر پہنچے ہیں کہ حملہ آور پاکستان سے آئے تھے اور انہوں نے دینا نگر تک پہنچنے کےلئے دریا میں سے گزرنے کے لئے نائٹ وژن ڈیوائس کا استعمال کیا۔