بارسلونا.......شفقت علی رضا.......اسپین کے شہر بارسلونا میں پاکستان کے ثقافتی اور علاقائی کھیل والی بال کاسالانہ آل یورپ ٹورنامنٹ منعقد ہوا جس میں فرانس ، اٹلی ، ہالینڈ ، بلجیم اور سپین کی ٹیموں نے حصہ لیا ۔

پاکستانی سفارتخانے کےویلفیئر اتاشی بارسلونا محمد اسلم خان غوری کی زیر صدارت ہونے والے اس ٹورنامنٹ کے مہمان خصوصی ایوارڈ یافتہ بزنس مین چوہدری امانت مہر آف گوڑھا جٹاں تھے ۔ٹورنامنٹ دیکھنے کے لئے یورپ بھر سے شائقین والی بال بارسلونا پہنچے تھے ۔

اسپین میں مقیم پاکستانیوں کے ساتھ ساتھ مقامی سیاسی ، مذہبی اور سماجی تنظیموں کےہسپانوی نمائندے بھی ٹورنامنٹ دیکھنے کے لئے اسٹیڈیم میں موجود تھے ۔فائنل میں شجاع کلب اور امرہ کلب کے مقررہ وقت تک پوائنٹس برابر ہونے کی وجہ سے محمد اقبال چوہدری اور حاجی نوید وڑائچ نے فرسٹ اور سیکنڈ انعام دونوں ٹیموں میںمساوی تقسیم کر دیا ۔

مین آف دی میچ اور مین آف دی ٹورنامنٹ کو نقد انعام اور ٹرافیاں دی گئیں۔ڈھول کی تھاپ ،یورپ بھر سے آنے والے مہمانوں کا شاندارا ستقبال اور نوجوانوں کے بھنگڑوں سے ٹورنامنٹ پنجاب کے کلچر کی تصویر نظر آ رہا تھا ۔پاکستان کے ثقافتی کھیلوں کو یورپ بھر میں متعارف کرانے کے لئے ایسے ٹورنامنٹ منعقد کرنے پر شائقین نے چوہدری امانت مہر اوربلال سرورسے اظہار تشکر کیا۔