جدہ… شاہد نعیم…سعودی خواتین نے صحت کی سہولیات کے حوالے سے آگہی مہم کے تحت 10 ہزار خواتین کی مدد سے چھاتی کے سرطان کا عالمی نشان "گلابی ربن" بنایا ہے جس کے نتیجے میں ان کا نام گنیز بک آف ورلڈ ریکارڈز میں درج ہوگیا ہے۔

نورہ بنت عبدالرحمن یونیورسٹی کے گراؤنڈ میں گلابی رنگ کے اسکارف اوڑھے کھڑی خواتین نے کامیابی سے یہ عالمی ریکارڈ اپنے نام کیا۔

الف خیر کے نام سے چلنے والی سوشل انٹرپرائز کی بانی شہزادی ریما بنت بندر بن سلطان السعود نے مقامی اخبار’ سعودی گزٹ‘ سے بات کرتے ہوئے کہا "آج 10 ہزار خواتین نے یہ اعلان کر دیا ہے کہ مکمل صحت ہی بطور مائیں، بہنیں اور بیٹیاں ہمارے کامیاب مستقبل کی ضمانت ہے۔"

ان کا مزید کہنا تھا کہ "ہم مستقبل کی آواز ہیں اور اگر ہم اپنا خیال خود رکھیں گی تو ہمارا مستقبل تابناک ہوگا۔ اگر ایسا نہیں ہوگا تو ہمارا مستقبل تاریک ہے اور مجھ سمیت 1900 رضاکار خواتین، 53 تنظیمیں اور دس ہزار عام خواتین ایسا دیکھنے کی خواہش رکھتی ہیں۔"

خواتین کے الیکشن میں حصہ لینے اور ووٹ ڈالنے کے حوالے سے ریما السعود کا کہنا تھا "یہ سعودی خواتین کے لئے انتہائی فخر کا لمحہ ہے ۔ اس طرح ہمیں معاشرے کی بہتری کے لئے اٹھائے جانے والے اقدامات میں شریک ہونے کا موقع ملا ہے۔ یہ ہم سب کے لئے ایک بڑا موقع ہے۔"

اس موقع پر ایک اور منتظم ڈاکٹر مودیا بیٹرجی کا کہنا تھا کہ ان کا بنیادی مقصد خواتین کی صحت کی طرف توجہ دلانا تھا اور انہوں نے زور دیا کہ مکمل صحت ہی مضبوط معاشرے کی بنیاد ہے۔

اس موقع پر زہرہ بریسٹ کینسر ایسوسی ایشن کی ایک رکن ہالہ اسیل نے بتایا کہ اس آگہی مہم کے نتیجے میں آج کئی افراد کو فائدہ ہوا ہے۔ ان کا مزید کہنا تھا کہ "میں دس ہزار خواتین کے ساتھ بنائے جانے والے اس ریکارڈ کی عالمی ریکارڈز میں شمولیت کی منتظر ہوں۔"

گنیز ورلڈ ریکارڈز کے منصف سیدا سباسی گم یچی کا کہنا تھا کہ "میں ریاض میں سب سے بڑے انسانی آگہی ربن کے ریکارڈ کو توڑنے کی کوشش کا عینی شاہد ہوں جس میں سعودی عرب کی خواتین نے حصہ لیا ہے۔"

اس ریکارڈ نے بھارت میں بنایا گیا پچھلا ریکارڈ توڑ ڈالا جس میں 6847 افراد نے شرکت کی تھی۔

سباسی گمیچی نے ریکارڈ کی وضاحت کرتے ہوئے بتایا "اس ریکارڈ کو بنانے کے لئے تمام شرکا کو ایک ہی رنگ کے کپڑے پہننا ہوں گے تاکہ فضائی منظر سے یہ ایک ہی رنگ کا دکھائی دے۔ اس کے علاوہ تمام شرکا کو کم از کم پانچ منٹ کے لئے ایک ہی جگہ پر کھڑا ہونا ہوگا۔"