غزہ .........حماس نے کہا ہے کہ جماعت فلسطین کی تمام سیاسی اور مذہبی قوتوں کیساتھ مفاہمت کا عمل آگے بڑھانے کو تیار ہے۔

حماس کے ترجمان مشیر المصری نے غزہ کی پٹی میں حماس کے ’یوم تاسیس‘ کی مناسبت سے ایک انٹرویو میں کہا کہ قومی اصولوں کی بنیاد پر تمام قومی قوتوں کیساتھ مفاہمت کا عمل آگے بڑھانے کو تیارہیں۔ترجمان نے کہاکہ فلسطینی قوم کے پاس آزادی اور قومی حقوق کے حصول کیلئے مزاحمت سے بہتر اور کوئی راستہ نہیں ہے۔

غاصب صہیونی ریاست سے فلسطینی قوم کو نجات دلانے کیلئے مزاحمت کا عمل جاری رکھیں گے، مسلح جدو جہد حماس کے مشن میں شامل ہے اور اسے کسی صورت میں ترک نہیں کیاجائیگا جب تک صہیونی دشمن فلسطینیوں کے غصب شدہ حقوق واپس نہیں دلاتا فلسطینی قوم اس وقت تک مزاحمت اور مسلح جدو جہد جاری رکھے گی۔

مشیر المصری نے غزہ کی پٹی کا محاصرہ ختم کرنے کا مطالبہ کرتے ہوئے کہا کہ غزہ کی پٹی کے دو ملین لوگوں کو سیاسی انتقام کی بھینٹ چڑھایا جا رہا ہے۔ پچھلے ایک عشرے سے غزہ کے لاکھوں عوام کو بنیادی سہولیات سے محروم کیا گیا۔ غزہ کی پٹی کی عوام کو محصور کرکے حماس اور قوم کو دیوار سے لگانے کی کوشش کی گئی۔