واشنگٹن.........ترک حکام نے داعش سے تعلق کے شبہ میں ایک شخص کو گرفتار کرلیا ،گرفتارشخص استنبول میں امریکی قونصل خانے پر خود کش حملے کی منصوبہ کررہا تھا۔

ترک ذرائع ابلاغ کے مطابق مشتبہ شخص شام کا شہری ہے جسے شام کی سرحد کے نزیک واقع ترکی کے جنوبی شہر کاہارمن مارس میں ایک بس اسٹیشن سے حراست میں لیا گیا۔حکام نے ملزم کو مقامی عدالت میں پیش کردیا ہے جبکہ اس سے تفتیش کی جارہی ہے۔

حکام نے شبہ ظاہر کیا ہے کہ ملزم استنبول جاکر حملہ کرنے سے پہلے غازیان تیپ جاکر داعش کے افراد سے بم بنانے کی تربیت حاصل کرنا چاہتا تھا۔ذرائع ابلاغ نے گرفتار ملزم کی شناخت محمد راحیل الحرادانی کے نام سے کی ہے۔گزشتہ ہفتے استنبول میں واقع امریکی قونصل خانے کو ممکنہ دہشت گرد حملے کی اطلاع پر ایک دن کے لیے بند کردیا گیا تھا۔

ترک حکام اکتوبر میں دارالحکومت انقرہ میں ہونے والے خود کش حملے کے بعد سے ملک میں مزید دہشت گرد حملوں کے خدشے کا اظہار کرتے رہے ہیں۔حملے میں 130 افراد ہلاک ہوگئے تھے جس کی ذمہ داری ترک حکام نے شدت پسند تنظیم داعش پر عائد کی تھی۔