ممبئی…این جی ٹی…حال ہی میں فلم دبنگ سے شہرت کی بلندیوں پر پہنچنے والی بالی ووڈ اداکارہ و ماڈل سوناکشی سنہا کل اپنی25ویں سالگرہ منائینگی۔2جون1987کو بالی ووڈ اداکار اور سیاستدان شتروگن سنہا کے گھر پیدا ہونے والی سوناکشی نے اپنے شوبز کیرئیر کا آغاز ماڈلنگ سے کیا تاہم بالی ووڈ میں انکی آمد بلاک بسٹر فلم" دبنگ" سے ہوئی جس میں انہوں نے سلمان خان کے مدِ مقابل مرکزی کردار ادا کیا ۔بالی ووڈ کی سب سے زیادہ بزنس کرنے والی فلموں میں شامل ہونے والی فلم" دبنگ" کے ذریعے ناصرف سوناکشی کو بالی ووڈ میں منفرد پہچان حاصل ہوئی بلکہ انہیں اس فلم میں بہترین اداکاری پر کئی ایوارڈز بھی ملے۔اپنی پہلی ہی فلم سے بے پناہ کامیابی سمیٹنے والی سوناکشی کو فوراً ہی بالی ووڈ میں کئی فلموں کی پیشکش ہوگئی اور آجکل وہ فلم جوکر،لٹیرا ،سن آف سردار اور دبنگ کے سیکوئل میں کام کررہی ہیں۔اپنی پہلی ہی فلم سے شہرت کی بلندیوں پر چڑھنے والی سوناکشی کی دوسری فلم گذشتہ روز ہی سینماگھروں کی زینت بنائی گئی ہے جس کی کامیابی کے امکانات ظاہر کیے جارہے ہیں۔