ممبئی......کنگ خان کو سینڈ آرٹ کے ذریعے خراج تحسین پیش کرنے کے انوکھے انداز نے شاہ رخ کے فین نے ان کی50سالہ زندگی کو خوبصورت شاہکار میں ڈھال دیا۔

یوں تو بالی ووڈ کنگ شا ہ رخ خان کے دنیا بھر میں لا تعداد فینزہیں جو انہیں خراج تحسین پیش کرنے کیلئے نت نئے اور انوکھے انداز اپنا تے ہیں لیکن بھارت سے تعلق رکھنے والے ایک سینڈ آرٹسٹ نے اپنی صلاحیتوں کا استعمال کرتے ہوئے کنگ خان کو خراج تحسین پیش کرنے کا منفرد انداز اپنا کر سب کو حیران کردیا ۔

راہل آریا نامی اس نوجوان نے ریت کے ذریعے شاہ رخ خان کی 50سالہ زندگی کو خوبصورت اور دلکش شاہکار میں ڈھال کر ان کے سب سے بڑے فین ہونے کا ثبوت دے دیا ہے۔200سیکنڈز پر مبنی اس وڈیو میں شاہ رخ خان کی بچپن سے لے کر اب تک کی زندگی کو نہایت خوبصورت طریقے سے بیان کیا گیا ہے جسے دیکھ کر عقل دنگ رہ جائے۔

ویڈیو کو دیکھ کریہ کہنا غلط نہ ہوگا ہے کہ جب بالی ووڈ کی نئی فلم’’فین‘‘نے ابھی سے کنگ خان کے مداحوں کو اتنا پر جوش کردیا ہے تو یقیناًیہ فلم ریلیز ہونے کے بعد باکس آفس پر اچھا بزنس کر سکے گی۔کنگ خان کی نئی فلم 'فین اگلے ماہ15اپریل کو سنیما گھروں کی زینت بنے گی ۔