لاہور… پاکستان تحریک انصاف کے چیئرمین عمران خان نے کہا ہے کہ رائے ونڈ میں بیٹھے لوگوں نے زرداری کو بچایا ہے اور قوم کو ڈراتے ہیں کہ جمہوریت کو نقصان پہنچے گا لیکن انہیں بتا دینا چاہتا ہوں کہ اب نہ مارشل لاء لگے گا اور نہ ہی فوج آئے گی۔ ان خیالات کااظہار انہوں نے لاھور آمد کے موقع پر میڈیا سے گفتگو کرتے ہوئے کیا۔ عمران خان کا کہناتھا کہ ملک جن بحرانوں سے گزر رہا ہے اس کا واحد حل صاف اور شفاف الیکشن ہیں جو صدر زرداری کی موجودگی میں نہیں ہوسکتے کیونکہ اس نے دھاندلی کا پروگرام بنا رکھا ہے۔عمران خان نے سپریم کورٹ کے معاملے پر گفتگو کرتے ہوئے کہا کہ ایک طرف آزاد عدلیہ اور دوسری طرف پاکستان کا سیاسی مافیا ، قبضہ مافیا اور اسٹیٹس کو کے لوگ ہیں جو قوم کا خو ن چوس رہے ہیں یہ پاکستان میں تبدیلی نہیں آنے دینا چاہتے کیونکہ یہ چاہتے ہیں کہ ایسا نظام آئے جو ان کے غیر قانونی دھندوں اور چوریوں کو نہ روکے۔ عمران کان نے کہا کہ سپریم کورٹ فیصلہ کرے گی کی چیف جسٹس کے بیٹے نے اگر کوئی غلط کام کیا ہے یا نہیں ، انہوں نے کہا کہ ملک ریاض نے ملک کو نیلام گھر بنادیا ہے وہ قرآن اٹھا کربتائیں کہ انہوں نے کس جج ،جرنیل اور جرنلسٹ کو خریدا ہے۔ایک سوال کے جواب میں انکاکہناتھا کہ میمو کیس میں آصف علی زرداری ملوث ہے کیونکہ حسین حقانی اسی کا بندہ تھا اور اسی نے اسے سفیر لگایا تھا۔