16 اگست ، 2016 
نیشنل ایکشن پلان، وزیراعظم کا تمام وزرائے اعلیٰ کو بلانے کا فیصلہ
16 اگست ، 2016
نیشنل ایکشن پلان پر عملدرآمد کے معاملے پر وزیراعظم نوازشریف نے تمام وزرائے اعلیٰ کو بلانے کا فیصلہ کرلیا، وزیراعظم کی زیر صدارت آئندہ ہفتے اجلاس متوقع ہے۔
گذشتہ روز وزیراعظم نوازشریف کی زیرصدارت اجلاس میں وزیرداخلہ نے نیشنل ایکشن پلان پر بریفنگ دی، ذرائع کے مطابق وزیرداخلہ نے بریفنگ میں کہا کہ نیشنل ایکشن پلان کے 9 پوائنٹس ایسے ہیں جو براہ راست صوبوں کی ذمہ داری ہیں، جبکہ 9 پوائنٹس پر عملدرآمد وفاقی حکومت اور صوبوں کی مشترکا ذمہ داری ہے، 4 پوائنٹس وزارت داخلہ سے متعلق ہیں۔
ذرائع کا کہنا ہے کہ وزرائے اعلیٰ کے ساتھ اجلاس میں وزیراعظم صوبوں سے نیشنل ایکشن پلان سے متعلق رپورٹ لینگے اور ہدایات دینگے۔
ذرائع کے مطابق چوہدری نثار نے موقف اختیار کیا کہ جب تک وزیراعظم خود مانیٹر نہیں کرینگے ،نتائج نہیں آئیں گے۔
مشیر قومی سلامتی ناصر جنجوعہ نے کہا کہ نیشنل ایکشن پلان کو سستی روی سے نکالنے کے لیے وزیراعظم، آرمی چیف اور وزیرداخلہ کی توجہ اور مدد درکار ہوگی۔
