کراچی میں خواتین پر حملوں کا ملزم گوجرانوالہ سے گرفتار، پولیس کا دعویٰ
15 اکتوبر ، 2017
کراچی میں خواتین کو تیز دھار آلے سے نشانہ بنانے والے مبینہ ملزم وسیم کو گوجرانوالہ سے گرفتار کرلیا گیا ہے۔
ڈی آئی جی ایسٹ سلطان خواجہ کے مطابق خواتین پر حملوں میں ملوث ملزم کے دوست کی نشاندہی پر پنجاب اور کراچی پولیس نے گوجرانوالہ میں مشترکہ کارروائی کی جس کے دوران وسیم نامی مبینہ ملزم کو گرفتار کرلیا گیا ہے۔
انہوں نے کہا کہ وسیم پر شبہ ہے کہ گلستان جوہر اور اطراف میں خواتین پر حملوں میں ملوث ہے۔
انہوں نے بتایا کہ وسیم کو کاغذی کارروائی کے بعد کراچی منتقل کیا جارہا ہےجبکہ ملزم کے کراچی کی وارداتوں میں ملوث ہونے کا معاملہ تحقیقات کے بعد ثابت ہوگا۔
ابتدائی اطلاعات کے مطابق ملزم وسیم کراچی میں خواتین کو تیز دھار آلے سے زخمی کرنے کے بعد فرار ہوجاتا تھا جسے گرفتار کرلیا گیا ہے اور اسے مزید تفتیش کے لئے کراچی منتقل کیا جائے گا۔
ذرائع کے مطابق مبینہ مرکزی ملزم وسیم کے قریبی دوست شہزاد کو پولیس نے 4 روز قبل ملیر سے حراست میں لیا تھا۔
چھری یا تیز دھار آلے سے خواتین کو نشانہ بنانے والا ملزم کراچی کے علاقے گلستان جوہر اور گلشن میں کارروائیاں کرتا تھا، اور اب تک 16 خواتین کا نشانہ بنا چکا ہے۔
ہیلمٹ پہن کر موٹرسائیکل سوار ملزم خواتین کو عقب سے نشانہ بناتا اور زخمی کرنے کے بعد فرار ہوجاتا تھا۔
اس سے قبل پولیس نے شبہ ظاہر کیا تھا کہ خواتین کو نشانہ بنانے والا ملزم نفسیاتی ہے جب کہ سندھ حکومت نے ملزم کی گرفتاری میں مدد دینے والے شخص کے لئے 5 لاکھ روپے انعام کا بھی اعلان کیا تھا۔
پولیس نے ملزم کی گرفتاری کے لئے کراچی کے مختلف علاقوں میں چھاپے مارے اور درجنوں افراد کو حراست میں بھی لیا لیکن کوئی کامیابی نہ مل سکی
جب کہ پولیس نے چھری مار ملزم کے شبہ میں رشوت لینے کے بعد افراد کو رہا بھی کیا۔
جمال شاہ نامی شہری کی درخواست پر جوڈیشل مجسٹریٹ ساؤتھ نے اینٹی وائلٹ کرائم سیل (اے وی سی سی) گارڈن میں چھاپہ مار کر 7 افراد کو بازیاب کرایا جنہیں جبراً حراست میں لیا گیا تھا۔
عدالتی چھاپے کے بعد 7 افراد کی بازیابی پر 2 انسپکٹروں کو گرفتار کر کے تھانے منتقل کرتے ہوئے ان پر مقدمہ بھی درج کیا گیا۔
