ایف بی آر نے پیراڈائز لیکس میں شامل 31 پاکستانیوں کی تفصیلات طلب کرلیں

اسلام آباد: فیڈرل بورڈ آف ریوینیو (ایف بی آر) نے پیراڈائیز لیکس میں شامل 31 پاکستانیوں کی ایف آئی اے، ایس ای سی پی اور اسٹیٹ بنک سے تفصیلات طلب کرلیں۔

جیو نیوز کو ملنے والی معلومات کے مطابق ایف آئی اے سے ان افراد کا گزشتہ 10 سال کا سفری رکارڈ طلب کیا گیا ہے جبکہ ایس ای سی پی سے ان افراد کی جانب سے رجسٹرڈ کروائی گئی کمپنیوں کی تفصیلات طلب کی گئی ہیں۔

ایف آئی اے اور ایس ای سی پی نے 13افراد کی تفصیلات ایف بی آر کو فراہم کر دی ہیں۔

ان میں سے اکثر کے پاس ایک سے زیادہ پاسپورٹ ہیں جبکہ ایس ای سی پی کے مطابق ان افراد نے 86 کمپنیاں رجسٹرد کروا رکھی ہیں۔

پیراڈائز لیکس: شوکت عزیز اور ایاز خان سمیت 135 پاکستانیوں کے نام شامل

جن پاکستانیوں نے آف شور اکاؤنٹس بنائے انہوں نے یا تو اپنے یا پھر آف شور کمپنیوں کے نام سے سوئس بینکوں میں اکاؤنٹس بنائے۔

خیال رہے کہ رواں ماہ کے آغاز میں پاناما پیپرز پاناما کی مشہور لاء فرم موزیک فونسیکا نے پیراڈائز پیپرز جاری کیے تھے جن میں میں پاکستان سمیت 47 ممالک کے متعدد افراد کے نام شامل تھے۔

پیراڈائز لیکس میں سابق وزیراعظم شوکت عزیز، نیشنل انشورنس کارپوریشن لمیٹڈ (این آئی سی ایل) کے سابق چیئرمین ایاز خان نیازی، صدر الدین ہاشوانی، میاں منشاء، ڈائریکٹ ٹو ہوم (ڈی ٹی ایچ) لائسنس کی کامیاب بولی دینے والے ظہیر الدین، سونیری بینک کے مالک نورالدین فیراستا، چیئرمین داؤد ہرکولیس کارپوریشن حسین داؤد اور دیگر نامور پاکستانیوں کی شناخت سامنے آئی ہے جنہوں نے آف شور سرمایہ کاری کر رکھی ہے۔

پیراڈائز لیکس میں ایک کروڑ 34 لاکھ دستاویزات شامل ہیں اور اس کام کے لیے 67 ممالک کے 381 صحافیوں کی خدمات حاصل کی گئیں۔

پیراڈائز لیکس کا بڑا حصہ کمپنی ایپل بائی کی دستاویزات پر مشتمل ہے اور یہ دستاویزات سنگاپور اور برمودا کی دو کمپنیوں سے حاصل ہوئی ہیں۔ پیرا ڈائز پیپرز پہلے جرمن اخبار نے حاصل کیے اور آئی سی آئی جے کے ساتھ شیئر کیے۔

پیراڈائز لیکس میں ملکہ برطانیہ سمیت اہم بین الاقوامی شخصیات کے نام شامل

اردن کی سابق ملکہ، امریکی وزیر خارجہ ریکس ٹلرسن، ڈونلڈ ٹرمپ کے قریبی ساتھیوں اور بڑی کمپنیوں کے حیران کن حقائق سامنے آگئے

ان میں 180 ممالک کی 25 ہزار سے زائد کمپنیاں، ٹرسٹ اور فنڈز کا ڈیٹا شامل ہے۔ پیراڈائز پیپرز میں 1950 سے لے کر 2016 تک کا ڈیٹا موجود ہے ۔

پیراڈائز پیپرز میں جن ممالک کے سب سے زیادہ شہریوں کے نام آئے ہیں ان میں امریکا 25 ہزار 414 شہریوں کے ساتھ سرفہرست ہے۔ برطانیہ کے 12 ہزار 707 شہری، ہانگ کانگ کے 6 ہزار 120شہری، چین کے 5 ہزار 675 شہری اور برمودا کے 5 ہزار 124 شہری شامل ہیں۔