17 فروری ، 2018 
کراچی میں ڈاکوؤں کی دیدہ دلیری، مصروف شاہراہ پر شہری کو لوٹ لیا
17 فروری ، 2018
کراچی کے علاقے ناظم آباد میں ڈاکوؤں نے کار سوار شہری کو سرعام چلتی ہوئی سڑک پر روک کر لوٹ لیا، گاڑی میں لگے کیمرے نے ڈاکوؤں کی فوٹیج محفوظ کرلی جس میں ملزمان کی شکلیں بھی واضح ہیں تاہم اب تک انہیں پکڑا نہیں جاسکا ہے۔
واقعے کی سامنے آنے والی ویڈیو میں دیکھا جاسکتا ہے کہ دوپہر تقریباً ساڑھے 12 بجے موٹر سائیکل سوار دو ڈاکوؤں میں سے ایک بلا خوف و خطر گاڑی کے سامنے آکھڑا ہوتا ہے اور کار سوار پر پستول تان لیتا ہے۔
سڑک سے دیگر گاڑیاں گزر رہی ہیں لیکن ڈاکو بغیر کسی خوف کے واردات کرنے میں مصروف ہے، اس کے بعد دوسرا ساتھی فرار ہونے کے لئے موٹرسائیکل موڑتا ہے اور کچھ دور جاکر کھڑا ہوجاتا ہے۔
چند لمحوں کی اس واردات کے بعد ملزمان باآسانی فرار بھی ہوگئے۔
دن بہ دن شہر میں اسٹریٹ کرمنلز کا خوف شہریوں میں بڑھتا جارہا ہے، اس واقعے کی فوٹیج میں ملزمان کی شکلیں بھی واضح ہیں لیکن پولیس کی وہی روایت برقرار کہ ملزمان کی تلاش جاری ہے۔
