پیپلز پارٹی اور تحریک انصاف نے ایمنسٹی اسکیم کو مسترد کردیا

پاکستان پیپلز پارٹی اور تحریک انصاف نے وزیراعظم شاہد خاقان عباسی کی جانب سے اعلان کردہ ایمنسٹی اسکیم کو مسترد کر دیا۔

سابق چیئرمین سینیٹ اور پیپلز پارٹی کے رہنما رضا ربانی نے وزیراعظم کی جانب سے ایمنسٹی اسکیم کو امیروں کے لیے غیر قانونی دولت کمانے کا لائسنس قرار دیتے ہوئے کہا کہ حکومت کی کالےدھن کو صاف کرنے کی اسکیم کی مذمت کرتے ہیں۔

سینیٹر رضا ربانی نے کہا کہ ماضی میں بھی ایسی اسکیمیں رائج کی گئیں جس کا کوئی خاطرخواہ نتیجہ سامنے نہیں آیا۔

انہوں نے کہا کہ موجودہ حکومت کی اقتصادی پالیسیاں بگ بزنس کے لیے ترتیب دی گئیں ہیں جو متوسط طبقے کے لیے صرف ٹیکسز اور بڑھتی ہوئی مہنگائی کا بوجھ ہے۔

ان کا کہنا تھا کہ ایمنسٹی اسکیم کی سینیٹ میں بھی مخالفت کریں گے۔

وزیراعظم نے ٹیکس شرح میں کمی اور ایمنسٹی اسکیم کا اعلان کر دیا

ایک لاکھ روپے ماہانہ آمدنی والوں پر کوئی ٹیکس نہیں ہو گا اور جن لوگوں کے اثاثے بیرون ملک ہیں وہ دو فیصد جرمانہ ادا کر کے ایمنسٹی اسکیم سے فائدہ اٹھا سکتے ہیں، وزیراعظم شاہد خاقان عباسی

وزیراعظم کی پریس کانفرنس پر ردعمل دیتے ہوئے تحریک انصاف کے رہنما اسد عمر نے کہا کہ ایمنسٹی اسکیم لانے کا مقصد قوم کی چوری شدہ دولت کو جائز بنانا ہے۔

انہوں نے کہا کہ حکمرانوں کی تحویل میں کالادھن حلال کرنے کی ہر کوشش کی مزاحمت کریں گے۔

ان کا کہنا تھا کہ ایمنسٹی اسکیم لاتے وقت حکومت نے شرم و حیا کا مظاہرہ نہیں کیا۔

تحریک انصاف کے رکن قومی اسمبلی نے سوال کیا کہ ’کیا پارلیمان سے مشاورت کے بغیر ایمنسٹی اسکیم لانا ووٹ کا تقدس ہے؟ یہ اقدام ووٹ کے تقدس کو پاؤں تلے روندنے کے مترادف ہے۔

انہوں نے کہا کہ ووٹ کے تقدس کے کھوکھلے نعرے لگانے والے پارلیمان کو اس کا مقام نہیں دیتے۔

اسد عمر نے کہا کہ حکومت پارلیمان سے مشاورت کے بغیر کسی قسم کی اسکیم لانے سے گریز کرے اور اگر حکومت نے ہٹ دھرمی کا مظاہرہ کیا تو اسے شدید مزاحمت کا سامنا کرنا ہو گا۔