14 جون ، 2018 
کراچی میں مافیا نے پانی چوری کرنے کا نیا طریقہ ڈھونڈ لیا
14 جون ، 2018
کراچی میں مافیا نے پانی چوری کرنے کا نیا طریقہ ڈھونڈ لیا ہے اور انتظامیہ کی ملی بھگت سے حب ڈیم سے شہر کو سپلائی کے لیے آنے والا پانی چوری کیے جانے کا انکشاف ہوا ہے۔
کراچی کے علاقے بلدیہ ٹاؤن میں حب ٹاؤن سے آنے والی 33 انچ کی پائپ لائن سے شہر کے مختلف علاقوں کو پانی کی سپلائی کی جاتی ہے۔
لیکن ٹینکر مافیا نے واٹر بورڈ اور پولیس کی ملی بھگت سے اس لائن سے پانی چوری کرنے کے لیے نیا طریقہ ڈھونڈ لیا ہے۔
پانی چور مافیا کی جانب سے بلدیہ ٹاؤن کے علاقے یوسف گوٹھ میں لائن کا پانی چوری کر کے گڑھوں میں جمع کیا جاتا ہے۔
علاقہ مکینوں کا بتانا ہے کہ واٹر بورڈ اور ٹینکر مافیا کی ملی بھگت سے اس لائن میں سوراخ کیے گئے ہیں جہاں سے پانی چوری کر کے ٹینکرز مافیا کو فروخت کیا جاتا ہے۔
پائپ لائن سے پانی چوری کرنے کے لیے زمین میں 20 فٹ تک گڑھے کیے گئے ہیں اور پھر سیکشن پمپس کی مدد سے پانی چوری کیا جاتا ہے۔
پولیس اہلکار بھی اس غیر قانونی دھندے میں ملوث ہیں اور مختلف مقامات پر قائم پولیس چوکیاں ان ٹینکرز سے 400 روپے تک بھتہ وصول کرتی ہیں۔
یہاں سے بھرے ہوئے ٹینکرز بلدیہ ٹاؤن اور سعید آباد کے علاقوں میں 2 سے 3 ہزار روپے میں فروخت کیے جاتے ہیں تاہم انتظامیہ نے اس سارے معاملے پر چپ سادھ رکھی ہے۔
