20 جولائی ، 2018 
مریم نواز کا پولیس ریسٹ ہاؤس سہالہ منتقل ہونے سے انکار
20 جولائی ، 2018
اسلام آباد: پاکستان مسلم لیگ نواز اور سابق وزیراعظم نواز شریف کی صاحبزادی مریم نواز نے پولیس ریسٹ ہاؤس سہالہ منتقل ہونے سے انکار کردیا ہے۔
جیل انتظامیہ ذرائع کے مطابق مریم نواز کا موقف ہے کہ وہ اپنے والد اور خاوند کیپٹن (ریٹائرڈ) صفدر کے ساتھ اڈیالہ میں ہی رہیں گی۔
ذرائع نے بتایا کہ انتظامیہ مریم نواز کو اڈیالہ سے ریسٹ ہاؤس منتقل کرنا چاہتی ہے اور گزشتہ تین روز سے اس حوالے سے انتظامات بھی کیے جاچکے ہیں۔
جیل انتظامیہ ذرائع نے بتایا کہ سہالہ ریسٹ کو سب جیل قرار دینے کےلیے تمام انتظامات مکمل کیے گئے اور اس سلسلے میں 20 لاکھ روپے خرچ کیے گئے ہیں۔
ریسٹ ہاؤس میں کیمرے اور نئی لائٹس لگائی گئی ہیں جبکہ مریم نواز کی رہائش کی جگہ کے اطراف قناعتیں اور تاریں لگا کر اس کو کمپاؤنڈ کی شکل دی گئی ہے ۔
ذرائع کے مطابق ریسٹ ہاؤس کے کچن اور واش رومز کی بھی تزئین و آرائش کی گئی ہے۔
مریم نواز کی منتقلی کے پیش نظر پولی کلینک اسپتال کے ڈاکٹروں کا ڈیوٹی روسٹر بھی جاری کیا گیا۔
مریم نواز کے انکارکے بعد جیل انتظامیہ کو نیا چیلنج درپیش
ذرائع کے مطابق اڈیالہ جیل میں خواتین قیدیوں کےلیے بیٹر کلاس کی سہولت نہیں اور ان کو دیگر خواتین قیدیوں کے ساتھ بیرک میں ہی رکھا گیا ہے جہاں سہولیات بہتر نہیں۔
ذرائع کا مزید کہنا تھا کہ جیل انتظامیہ کو مریم نواز کو بیٹر کلاس نہ دینے پر تنقید کا سامنا ہے۔
خیال رہے کہ احتساب عدالت نے 6 جولائی کو ایون فیلڈ ریفرنس میں سابق وزیراعظم نواز شریف، مریم نواز اور کیپٹن ریٹائرڈ صفدر عباسی کو سزا سنائی تھی۔
نواز شریف اور مریم نواز 13 جولائی کو وطن واپس آئے تھے جس کے بعد انہیں گرفتار کر کے اڈیالہ جیل منتقل کر دیا گیا تھا۔
