نوازشریف کو بی کلاس الاٹ، مریم کا بہتر سہولیات لینے سے انکار

راولپنڈی: سابق وزیراعظم میاں نوازشریف کو اڈیالہ جیل میں بی کلاس دے دی گئی جب کہ مریم نواز نے جیل میں بہتر سہولیات لینے سے انکار کردیا۔

نواز شریف اور مریم نواز کو اڈیالہ جیل میں علیحدہ علیحدہ قید  رکھا گیا ہے۔

نواز شریف اور دیگر ملزمان کے خلاف دیگر ریفرنسز میں احتساب عدالت کی آئندہ کارروائی اڈیالا جیل میں ہی چلائی جائے گی اور اس حوالے سے  وزارت قانون نے نوٹیفکیشن جاری کردیا  ہے۔

نواز شریف اور مریم نواز گرفتاری کے بعد اڈیالہ جیل منتقل

پاکستان کو میدان جنگ بنادیا گیا ہے، ملک بھر میں جگہ جگہ رکاوٹیں کھڑی کردی گئی ہیں، نواز شریف کی طیارے میں گفتگو

ایون فیلڈ ریفرنس کے کیس میں سزا پانے والے نوازشریف اور ان کی صاحبزادی مریم نواز کو گزشتہ روز وطن واپس پہنچنے پر لاہور ائیرپورٹ سے گرفتار کیا گیا جس کے بعد انہیں راولپنڈی کی اڈیالہ جیل منتقل کردیا گیا تھا۔

ذرائع کے مطابق نواز شریف اور مریم نواز  کو جیل میں رکھنے سے متعلق پلان میں تین مرتبہ تبدیلی کی گئی تاہم آخر میں نواز شریف شریف اور مریم نواز کو اڈیالہ جیل میں ہی رکھنے کا فیصلہ کیا گیا۔

اطلاعات کے مطابق نواز شریف کو جیل میں بی کلاس دی گئی ہے اور جیل مینول کے مطابق بی کلاس میں ٹیلی ویژن، اخبار اور بیڈ کی سہولت دی جاتی ہے جب کہ اٹیچ باتھ روم، پنکھا اور ایک مشقتی بھی دیا جاتا ہے۔

مریم نواز کو گزشتہ رات اڈیالہ جیل میں ہی رکھا گیا اور انہیں سہالہ ریسٹ ہاؤس منتقل نہ کرنے کا فیصلہ کیا گیا  جس کے بعد انہیں خواتین کے سیل میں منتقل کیا گیا ہے۔

نواز شریف کے خلاف دیگر 2 نیب ریفرنسز کا ٹرائل اب جیل میں ہی ہوگا

اسلام آباد کی احتساب عدالت نمبر 1 نواز شریف اور دیگر کے خلاف العزیزیہ اسٹیل ملز اور فلیگ شپ انویسٹمنٹ ریفرنس کا ٹرائل اڈیالہ جیل میں کرے گی۔

مریم نواز کا بی کلاس لینے سے انکار

اڈیالہ جیل میں قید مریم نواز نے بہتر سہولیات لینے سے انکار کردیا ہے۔

مریم نواز نے ایک خط لکھا ہے جسے ان کی ٹیم نے سوشل میڈیا پر پوسٹ کیا ہے۔

خط میں کہا گیا ہےکہ مجھے جیل سپرنٹنڈنٹ نے جیل میں بہتر سہولیات لینے کے لیے درخواست دینے کا کہا جس پر میں نے بی کلاس لینے سے انکار کردیا ہے۔

ان کا کہنا تھاکہ اڈیالہ جیل میں عام قیدیوں کی طرح رہوں گی، مجھے عام قیدیوں والا کھانا دیا جائے، میں گھر سے کھانا نہیں منگواؤں گی اور نہ ہی مجھے گھر کا کھانا فراہم کیا جائے۔

مریم نواز نے مزید کہا کہ مجھے قیدی بنایا گیا ہےکہ تو جیل میں ایک قیدی کی طرح زندگی گزاروں گی، یہ میرا ذاتی فیصلہ ہے جو کسی دباؤ کے تحت نہیں لیا۔

ذاتی سامان جیل منتقل

نوازشریف اور مریم نواز کا لاہور سے لایا گیا ذاتی سامان بھی اڈیالہ جیل منتقل کردیا گیا۔

سابق وزیراعظم کا ذاتی اسٹاف سامان لے کر اڈیالہ جیل پہنچا جس میں کپڑے، شیونگ کا سامان اور دیگر چیزیں شامل ہیں جب کہ سامان میں نوازشریف کی ادویات بھی شامل ہیں۔

نوازشریف اور مریم میڈیکل چیک اپ میں صحت مند قرار

ذرائع کے مطابق نواز شریف اور مریم نواز کا میڈیکل چیک اپ بھی کیا گیا جس میں میدْیکل ٹیموں نے دونوں کو صحت مند قرار دیا۔

یاد رہے کہ سپریم کورٹ کے پاناما کیس سے متعلق 28 جولائی 2017 کے فیصلے کی روشنی میں نیب نے شریف خاندان کے خلاف 3 ریفرنسز احتساب عدالت میں دائر کیے تھے، جو ایون فیلڈ پراپرٹیز، العزیزیہ اسٹیل ملز اور فلیگ شپ انویسمنٹ سے متعلق ہیں۔