شعبہ صحافت سے وابستہ طلباء و طالبات کیلئے 'پُرعزم ایوارڈذ' تقریب

اسلام آباد: وزارت اطلاعات و نشریات اور کمیونیکیشن ریسرچ پراجیکٹ کے تعاون سے شعبہ صحافت سے وابستہ طلبہ و طالبات کی استعداد بڑھانے کے لیے تربیتی سیشن 'پُرعزم ایوارڈذ' کا انعقاد کیا گیا جس میں نمایاں کارکردگی پیش کرنے والوں میں انعامات تقسیم کیے گئے۔

پُرعزم ٹریننگ ایوارڈ گزشتہ تین برس سے شعبہ صحافت سے تعلق رکھنے والی مخلتف جامعات کے طالبعلموں کے لیے منعقد کیا جارہا ہے جہاں انہیں صحافت کے بنیادی اصول سے متعلق آگاہی دی جاتی ہے تاکہ مستقبل میں ان کی پیشہ ورانہ صلاحیت کے لیے مددگار ثابت ہو۔

پُرعزم ٹریننگ ایوارڈز کو مخلتف کیٹیگریز میں تقسیم کیا گیا جس میں ویڈیوز، نیوز پیکجز، ٹیکسٹ اسٹوریز، شارٹ فلمز، ڈاکیو مینٹریز، پوسٹرز اور مصوری کے فن پارے شامل تھے۔

ٹریننگ ایوارڈز میں شرکت کے لیے صحافیوں، طلباء، آرٹسٹ نے حصہ لیا جن کا تعلق اسلام آباد، راولپنڈی، لاہور، کراچی، پشاور، کوئٹہ، بہاولپور، مالاکنڈ، سوات، گلگت اور سرگودھا سے تھا۔

ویڈیوز ڈاکومینٹری کی کیٹیگری میں بحریہ یونیورسٹی اسلام آباد کے احسن اور سرادر بہادر خان ویمن یونیورسٹی کوئٹہ کی اقصیٰ ہادی نے مشترکہ طور پر پہلی پوزیشن حاصل کی۔

پوسٹر کیٹیگری میں یونیورسٹی آف سندھ جامشورو کے شہباز علی سرفہرست رہے جب کہ دوسری پوزیشن محمد موسی اور تیسری پوزیشن محمد صابر نے حاصل کی۔

شارٹ فلم کیٹیگری میں یونیورسٹی آف پنجاب کے حافظ علی یوسف نے پہلی جب کہ پشاور کے مختار اور علی خرم خان نے دوسری اور تیسری پوزیشن پر اپنی جگہ بنائی۔

نیوز رپورٹ کیٹیگری میں نورالعارفین نے پہلی، کراچی کے نورالہدیٰ نے دوسری جب کہ پشاور سے خالد الرحمان نے تیسری پوزیشن حاصل کی۔

تحریری کہانیوں کے مقابلے میں شیزا مستعین نے نمایاں کارکردگی دکھا کر پہلی پوزیشن حاصل کی جب کہ سندس دوسری اور لاہور کالج ویمن یونیورسٹی کی سدرہ نے تیسری پوزیشن حاصل کی۔ 

طلبہ و طالبات کا کہنا تھا کہ ایسی سرگرمیوں کے مواقع زیادہ سے زیادہ فراہم کیے جانے چاہییں تاکہ ان کی صلاحیتوں کو نکھارا جا سکے۔