ملکی معیشت غیرضروری اخراجات کی متحمل نہیں ہوسکتی: مشیرخزانہ

اسلام آباد: وزیر اعظم عمران خان کے مشیر برائے خزانہ ڈاکٹرعبدالحفیظ شیخ  کا کہنا ہے کہ ملکی معیشت غیرضروری اخراجات کی متحمل نہیں ہوسکتی۔

عبدالحفیظ شیخ کا کہنا تھا کہ آئندہ بجٹ غریب دشمن نہیں ہوگا بلکہ معیشت دوست ہوگا۔

ان کا کہنا تھا کہ ٹیکس آمدن بڑھانے کے لیے ہرممکن اقدام کریں گے، غریبوں پر ٹیکسوں اور مہنگائی کا بوجھ نہیں پڑنے دیں گے۔

معیشت کی بہتری کیلئے پاک فوج کا بڑا فیصلہ، دفاعی بجٹ میں اضافہ نہ لینے کا اعلان

پاک فوج کے اقدام کو سراہتا ہوں، فوج نے دفاعی اخراجات میں کٹوتی نازک معاشی صورتحال کی وجہ سے کی، حکومت یہ رقم ضم شدہ قبائلی علاقوں اور بلوچستان کی ترقی پر خرچ کرے گی، وزیراعظم

مشیر خزانہ کے مطابق بجٹ میں روزگار کے مواقع پیدا کیے جائیں گے اور آئندہ بجٹ میں کفایت شعاری سے خرچے بچائیں گے۔

ان کا کہنا تھا کہ خسارہ کم کرنے کے لیے غیر ضروری اخراجات کم کریں گے کیوں کہ ملکی معیشت غیرضروری اخراجات کی متحمل نہیں ہوسکتی۔

یاد رہے کہ چند روز قبل معیشت کی بہتری کے لیے پاک فوج نے بڑا فیصلہ کرتے ہوئے دفاعی بجٹ میں اضافہ نہ لینے کا اعلان تھا۔ 

آرمی چیف جنرل قمر جاوید باجوہ نے اپنے ایک بیان میں اعلان کیا تھا کہ رواں مالی سال دفاعی بجٹ میں کوئی اضافہ نہیں لیا جائے گا۔

بھارتی میڈیا کی جانب سے پاک فوج کے دفاعی بجٹ میں اضافہ نہ لینے کے فیصلے خلاف پروپیگنڈا بھی کیا گیا تھا جس پر ڈی جی آئی ایس پی آر میجر جنرل آصف غفور نے بھارتی میڈیا کو بھرپور جواب دیا تھا۔