20 ستمبر ، 2019 
پی آئی اے کی لاجواب سروس، 46 پروازیں بغیر کسی مسافر کے ہی اڑانے کا انکشاف
20 ستمبر ، 2019
اسلام آباد: پی آئی اے کی ناقص کارکردگی اور کرپشن کی ایک اور کہانی سامنے آگئی جس میں قومی ائیرلائن کی 46 پروازیں بغیر مسافر ہی آپریٹ کیے جانے کا انکشاف ہوا ہے۔
جیونیوز کو موصول ہونے والی آڈٹ رپورٹ کے مطابق ایک سال میں اسلام آباد ائیرپورٹ سے پی آئی اے کی 46 پروازیں بغیر کسی مسافر کے آپریٹ کی گئیں یعنی 17-2016 کے دوران ایسی 46 پروازیں اڑائی گئیں جن میں میں ایک بھی مسافر سوار نہ تھا۔
رپورٹ میں بتایا گیا ہےکہ بغیر مسافر 46 پروازیں آپریٹ کرنے سے قومی ائیرلائن کو 18 کروڑ روپوں سے زائد کا نقصان ہوا۔
رپورٹ میں مزید انکشاف کیا گیا ہےکہ ان پروازوں کے علاوہ 36 حج اور عمرہ کی پروازیں بھی بغیر کسی مسافر کے روانہ ہوئیں، اکتوبر 2018 میں انتظامیہ کو معاملے سے آگاہ کیا گیا لیکن موجودہ انتظامیہ نے بھی معاملے کی تحقیقات نہیں کروائی۔
رپورٹ کے مطابق سرکاری دستاویزات میں معاملے کا ذمہ دار پی آئی اے انتظامیہ کی لاپرواہی کو قرار دیا گیا۔
