03 اکتوبر ، 2019 
کراچی کے اسپتال میں نرسزکا رقص، سعید غنی حرکت میں آگئے
03 اکتوبر ، 2019
کراچی میں صنعتی مزدوروں کیلئے قائم سب سے بڑے سرکاری اسپتال میں ڈانس پارٹی کی مبینہ ویڈیو منظر عام پر آگئی جس میں نرسیں کام کے بجائے رقص میں مصروف ہیں۔
سوشل میڈیاپر عام ہونے والی ویڈیو میں دیکھا جاسکتا ہے کہ کراچی کے اہم صنعتی علاقے سائٹ میں قائم ولیکا سوشل سیکیورٹی اسپتال میں نرسیں مریضوں کی دیکھ بھال کے بجائے رقص میں مصروف ہیں اور اسپتال کے میڈیکل سپرنٹنڈنٹ (ایم ایس )سمیت دیگر انتظامی افسران بھی تماشا دیکھنے میں مصروف ہیں۔
ویڈیو میں رقص دیکھنے والوں میں اسپتال کے میڈیکل سپرنٹنڈنٹ ڈاکٹر اعظم سلہری، ڈپٹی ایم ایس ڈاکٹر غلام مصطفیٰ ابڑو اور دیگر انتظامی افسران شامل ہیں۔
سوشل میڈیا پراسپتال میں نرسوں کے رقص کی ویڈیوعام ہوئی تو سندھ حکومت کو ہوش آیا۔
صوبائی وزیر محنت سعید غنی نے اسپتال کےایم ایس اور ڈپٹی ایم ایس کو عہدوں سے ہٹا کر کمشنر سندھ ایمپلائز سوشل سیکیورٹی انسٹی ٹیوشن (سیسی) کے دفتر رپورٹ کرنے کا حکم دے دیا جبکہ اسپتال کے میٹرن، دو نرسوں اور نرسنگ ایڈ خورشید کو معطل کر دیا۔
وزیر محنت نے معاملے کی تحقیقات کیلئے کمیٹی قائم کر کے تین دنوں میں رپورٹ بھی طلب کر لی ہے۔
دوسری جانب کمشنر سیسی کاشف گلزار شیخ کے مطابق ایک ملازم کی ریٹائرمنٹ پر تقریب کا اہتمام کیا گیا تھا تاہم تحقیقات میں صورتحال واضح ہو جائے گی۔
