آرمی چیف کی توسیع: سپریم کورٹ کے فیصلے کے بعد وزیراعظم کا مختلف آپشنز پر غور

آرمی چیف کی مدت ملازمت میں توسیع کے حوالے سے سپریم کورٹ کا تفصیلی فیصلہ آنے کے بعد وزیراعظم عمران خان مختلف آپشنز پر غور کررہے ہیں۔

ذرائع کا کہنا ہے کہ فیصلے پر نظر ثانی کی درخواست دائر کرنی ہے یا قانون سازی؟ اس حوالے سے حکومت سپریم کورٹ کے فیصلے کا جائزہ لے رہی ہے۔

ذرائع کا کہنا ہے کہ وزیراعظم عمران خان مختلف آپشنز پر غور کررہے ہیں اور حتمی فیصلہ وہی کریں گے۔

نظر ثانی کی درخواست کا فائدہ نہیں

قانون نہ بن سکا تو 6 ماہ بعد آرمی چیف ریٹائر ہو جائیں گے، سپریم کورٹ کا تفصیلی فیصلہ

ادارہ جاتی پریکٹس کے تحت ایک جنرل تین سال کی مدت ملازمت پوری ہونے پر ریٹائرڈ ہوتا ہے، وزیراعظم کو ایسا کوئی فیصلہ کرنے کا آئینی اختیار حاصل نہیں ہے: سپریم کورٹ کا فیصلہ

ماہر قانون بابر ستار کا کہنا ہے کہ سپریم کورٹ کے فیصلے پر عمل درآمد کےلیے پارلیمنٹ کو قانون سازی کرنا ہوگی۔

انہوں نے کہا کہ آئین میں ترمیم کی ضرورت نہیں، حکومت نے خود عدالت میں یقین دہانی کرائی تھی کہ 6 ماہ میں قانون سازی کرلی جائے گی اس لیے اب نظر ثانی میں جانے کا جواز نہیں رہتا۔

اٹھارویں ترمیم میں ایکسٹینشن کا معاملہ وزیراعظم پر چھوڑا گیا

ماہر قانون فیصل چوہدری کہتے ہیں کہ سپریم کورٹ کے فیصلے کی روشنی میں پارلیمنٹ چاہے تو قانون سازی کرسکتی ہے اور چاہے تو نہیں بھی کرے۔

انہوں نے کہا کہ 1973 کے آئین اور بعد میں اٹھارویں ترمیم میں ایکسٹینشن کے معاملے کو وزیراعظم کی صوابدید پر چھوڑا گیا جو سویلین بالادستی کے لیے ضروری ہے۔

تمام قانون سازوں کی ذمہ داری ہے کہ اپنا کردار ادا کریں، فیصل جاوید

تحریک انصاف کے سینیٹر فیصل جاوید کا کہنا ہے کہ یہ انتہائی قومی مفاد کی قانون سازی ہے، سیکیورٹی معاملات سے جڑی ہے، تمام قانون سازوں کی ذمہ داری بنتی ہے کہ اپنا کردار ادا کریں۔

' آرمی چیف کے عہدے کا اہم پہلوکسی قانون کے دائرے میں نا آنا آئین کی روح کےمنافی ہے'

آئین کے تحت صدر کے مسلح افواج سے متعلق اختیارات قانون سے مشروط ہیں، سپریم کورٹ کے تفصیلی فیصلے میں چیف جسٹس کا اضافی نوٹ

فیصل جاوید نے مزید کہا کہ پارلیمنٹ میں قانون سازی میں مشکل پیش نہیں آئے گی، بہت آسانی سے قانون سازی ہوجائے گی۔

انہوں نے کہا کہ یہ ایکٹ آف پارلیمنٹ سے بھی ہوجائے گا اور دو تہائی اکثریت کی طرف معاملہ گیا تو وہاں بھی ہوجائے گا، یہ انتہائی قومی مفاد کا معاملہ ہے، اس میں سیاسی معاملات نہیں آئيں گے۔

خیال رہے کہ 28 نومبر 2019 کو آرمی چیف کی مدت ملازمت میں توسیع سے متعلق کیس میں سپریم کورٹ نے حکومت کو 6 ماہ میں قانون سازی کرنے کا حکم دیتے ہوئے چیف آف آرمی اسٹاف جنرل قمر جاوید باجوہ کی مدت میں 6 ماہ کی مشروط توسیع دی تھی۔

آرمی چیف کی مدت ملازمت میں توسیع سے متعلق آج تفصیلی فیصلہ جاری کیا گیا جو 39 صفحات پر مشتمل ہے جسے 3 رکنی بینچ میں شامل جسٹس منصور علی شاہ نے تحریر کیا ہے۔

فیصلے میں کہا گیا ہے کہ اگر چھ ماہ میں قانون نہ بن سکا توآرمی چیف جنرل قمر جاوید باجوہ 29 نومبر 2019 سے ریٹائر تصور ہوں گے جس کے بعد صدر پاکستان وزیراعظم کی ایڈوائس پر حاضر سروس جنرل کا بطورآرمی چیف تقرر کریں گے۔