28 اگست ، 2012 
کراچی، رات سے اب تک فائرنگ کے واقعات میں5افراد ہلاک
28 اگست ، 2012
کراچی… کراچی کے مختلف علاقوں میں رات بارہ بجے سے اب تک فائرنگ کے واقعات میں مزید پانچ افراد ہلاک ہوگئے ہیں۔ اس طرح 24 گھنٹوں کے دوران مرنے والے افراد کی تعداد 17 ہو گئی۔ پولیس کے مطابق نیو کراچی سیکٹر فائیو جے میں گھر کے باہر بیٹھے ایک شخص کو نامعلوم افراد نے فائرنگ کرکے ہلاک کردیا جس کی شناخت اشرف کے نام سے ہوئی ہے۔ جمشید روڈ پر بھی فائرنگ سے ایک شخص ہلاک ہوگیا، مقتول عاقب سیاسی جماعت کا کارکن بتایا جاتا ہے۔ لائنزایریا میں نامعلوم افراد نے گلی میں فائرنگ کرکے دو افراد، دانش اور فراز کو زخمی کردیا۔ جو اسپتال منتقل کیے جانے کے دوران راستے میں دم توڑگئے۔ ادھر کورنگی ڈھائی نمبرمیں نامعلوم افراد کی فائرنگ سے ذوالفقارعلی نامی شخص ہلاک ہوگیا۔ گزشتہ روزبھی مختلف علاقوں میں فائرنگ اور پرتشدد واقعات میں 12افراد ہلاک ہوئے تھے۔
