06 مئی ، 2020 
وزیر اعظم کے فیس بک پیج پر ٹائیگر فورس سے منسوب رضاکاروں کی تصویر جھوٹی نکلی
06 مئی ، 2020
وزیر اعظم عمران خان کے آفیشل فیس بُک پیج پر کورونا ریلیف ٹائیگر فورس کی جانب سے سیالکوٹ کی مساجد میں جراثیم کش اسپرے کرنے کا دعویٰ کرنے والی تصویر جھوٹی نکلی۔
عمران خان کے فیس بک پیج پر تین رضاکاروں کی تصویر شیئر کی گئی جنہیں کورونا ریلیف ٹائیگر فورس سے منسوب کیا گیا اور بتایا گیا کہ ان رضاکاروں نے نماز سے قبل سیالکوٹ کی مساجد میں جراثیم کش اسپرے کر کے اپنی خدمات انجام دی ہیں۔
دوسری جانب سیالکوٹ کی ایک نجی تنظیم کے ذمہ داروں نے اس دعوے کو جھوٹا قرار دیتے ہوئے کہا ہے کہ وزیراعظم کے آفیشل پیج پر شائع کی جانے والی تصویر مصطفی اسکاؤٹ کی ہے۔
تصویر میں دیکھے جانے والے کارکنان کا تعلق سیالکوٹ سے ہے جنہوں نے اپنے ویڈیوں بیان میں ٹائیگر فورس سے لاتعلقی کا اظہار خود کیا ہے۔
سیالکوٹ کی نجی تنظیم مصطفیٰ اسکاؤٹ اور مسلم لیگ ن کے کارکن قیصر بھٹی اور مختارحسین نے اپنے ویڈیو بیان میں کہا کہ وہ ٹائیگر فورس کا حصہ نہیں ہیں بلکہ رضا کارانہ طور پر اپنی تنظیم اور مسلم لیگ (ن) پارٹی کے لیے کارخیر میں اپنا حصہ ڈال رہے ہیں اور مساجد، امام بارگاہوں، چرچ اور مندروں میں جراثیم کش اسپرے کر رہے ہیں۔
ان کا کہنا تھا کہ فلاحی کام کرتے ہوئے ان کی جانب سے بنائی گئی ویڈیو میں بھی مسلم لیگ ن کے سابق صوبائی وزیر بلدیات اور دیگر مقامی رہنماؤں کو ان رضا کاروں کے ساتھ دیکھا جا سکتا ہے۔
جراثیم کش اسپرے کرنے والی نجی تنظیم نے مطالبہ کیا کہ ان کی یہ تصویر فوری طور پر عمران خان کے آفیشل پیج سے ہٹائی جائے۔
بعدازاں جراثیم کش اسپرے کرنے والی نجی تنظیم کے مطالبے پر عمران خان کے آفیشل پیج سے یہ تصویر ہٹا دی گئی ہے۔
مزید خبریں :
چیئرمین واپڈا سجاد غنی نے عہدے سے استعفیٰ دے دیا
20 جون ، 2025
