31 اگست ، 2020 
مسائل کی وجہ کراچی کا انتظام 17 اداروں میں بٹا ہوا ہونا ہے: مرتضیٰ وہاب
31 اگست ، 2020
سندھ حکومت کے ترجمان مرتضیٰ وہاب نے کہا ہے کہ کراچی میں مسائل کی وجہ شہر کا انتظام 17 مختلف اداروں میں بٹا ہوا ہونا ہے۔
مرتضیٰ وہاب کا کہنا تھا کہ ڈیفنس کے کچھ علاقوں میں نکاسی کا نظام ہی نہیں ہے ، پمپ سے پانی نکال کر کہاں پھینکا جائے؟ یہ علاقے سندھ حکومت کے زیر انتظام نہیں آتے پھر بھی مسائل حل کرنے کےلیے تمام وسائل بروئے کار لارہےہیں۔
انہوں نے کہا کہ کھارادر، میڈیسن مارکیٹ ، اردو بازار میں جہاں کیچڑ موجود ہے، اب وہاں سے اسے بھی نکالنےکا کام شروع کیا جائے گا۔
مرتضیٰ وہاب کا کہنا تھا کہ کراچی میں مسائل کی وجہ شہر کا انتظام 17 مختلف اداروں میں بٹا ہوا ہونا ہے۔
خیال رہے کہ گزشتہ دنوں ہونے والی بارش کے بعد اب بھی کراچی کے پوش علاقوں ڈیفنس اور کلفٹن میں پانی کھڑا ہے اور علاقہ مکینوں نے کلفٹن کنٹونمنٹ بورڈ کے دفتر کے سامنے دھرنا دے دیا ہے۔
