صوابی… نواز شریف زرداری حکومت کو بچاتے ہیں،تحریک انصاف کی حکومت آئی اور اگر ڈرون حملے ہوئے تو ہم حکومت چھوڑ دیں گے لیکن اپنے لوگوں کو مرنے نہیں دیں گے،صوابی میں جلسے عام سے خطاب کرتے ہوئے چیئرمین تحریک انصاف عمران خان کا کہنا تھا کہ حکومت کی اجازت سے ڈرون حملے ہورہے ہیں کل پھر ایک ڈرون حملے میں 10 پاکستانی شہید ہوئے،ن لیگ کے حوالے سے انہوں نے کہا کہ نواز شریف زرداری حکومت کو بچاتے ہیں ان کے خاندان کے اثاثے اقتدار میں آنے کے بعد 15 ارب روپے تک پہنچ گئے، انہوں نے کہاکہ پچھلے 4 سال میں حکومت نے ساڑھے 8 ہزار ارب روپے کرپشن میں چوری کیے، حکومت نے ٹیکس چوری اورنااہلی کی وجہ سے ساڑھے 8 ہزار ارب روپے کا نقصان پہنچایا، لیکن تحریک انصاف ملک میں انقلاب لے کر آئے گی، پورے پاکستان میں یکساں نظام تعلیم لایا جائے گا، تحریک انصاف ملک کو امریکا کی غلامی سے آزاد کرے گی، کسی سے قرضہ نہیں لیں گے اپنی قوم سے ہی پیسہ اکٹھا کرکے دکھاوٴں گا۔ جلسے سے خطا ب کرتے ہوئے رہ نما تحریک انصاف جاوید ہاشمی نے کہا کہ آنے والا وقت تحریک انصاف کے پرچم کا ہے، تحریک انصاف ملک کو کرپشن اور لٹیروں سے نجات دلائے گی،انہوں نے کہا کہ لیڈر رہزن اور چور بن گئے ہیں، 60 سال تک قوم لٹتی رہی،لیکن اب پورا پاکستان کرپشن کے خلاف لڑنے کے لیے اٹھ کھڑا ہوگیا۔