17 دسمبر ، 2020 
کراچی میں کڑاکے کی سردی، درجہ حرارت 7 سینٹی گریڈ تک گرگیا
17 دسمبر ، 2020
کراچی میں کڑاکےکی سردی نے شہریوں کو مزہ چکھادیا۔
شہر قائد میں کوئٹہ کی یخ بستہ ہواؤں نے درجہ حرارت 7 ڈگری سینٹی گریڈ تک گرادیا، جس کے باعث پیدل نکلنے اور موٹرسائیکل پر دفتر جانے والوں کی قلفی جم گئی۔
محکمہ موسمیات کا کہنا ہے کہ کراچی میں صبح 6 بجے درجہ حرارت 7 ڈگری ریکارڈکیا گیا جب کہ صبح 8 بجے کا درجہ حرارت 12 ڈگری سینٹی گریڈ تھا۔
محکمہ موسمیات کے مطابق کراچی میں شمال مشرق سے ہوائیں 7 کلومیٹر فی گھنٹہ کی رفتار سے چل رہی ہیں اور ہوا میں نمی کا تناسب 53 فیصد ہے۔
محکمہ موسمیات کا بتانا ہے کہ کراچی میں سائبیرین ہواؤں کے باعث درجہ حرارت میں کمی آئی ہے جب کہ 24 گھنٹوں کے دوران بھی مطلع صاف، موسم خشک اور رات میں سرد رہنے کا امکان ہے۔
دوسری جانب ناسا نے برف سے ڈھکی ہمالیہ چوٹیوں کی خلا سے لی گئی تصاویر جاری کردیں جن میں پاکستان کے شہرلاہور اوربھارتی شہردلی کی روشنیاں بھی واضح ہیں۔
