مینگورہ…سوات میں کی جرات مند لڑکی ملالہ یوسف زئی کوقاتلانہ حملے میں شدید زخمی ہونے کے بعدپشاور کے سی ایم ایچ اسپتال منتقل کردیا گیا ہے، آپریشن کیلئے لیڈی ریڈنگ اسپتال سے ڈاکٹروں کی ٹیم طلب کرلی گئی ہے، ملالہ کے سی ٹی اسکین اور دیگر ٹیسٹ کے بعد ڈاکٹرز اس کی صحت کے بارے میں حتمی رائے دے سکیں گے، دوسری جانب حملے کی ذمہ داری کالعدم تحریک طالبان نے قبول کرلی ہے۔ ملالہ یوسف زئی آج دوپہر مینگورہ میں اسکول سے گھر جارہی تھی کہ اس کی گاڑی پر نامعلوم شخص نے فائرنگ کردی، ملالہ اور 2بچیاں فائرنگ سے زخمی ہوگئیں۔ تینوں بچیوں کو فوری طور پر ڈسٹرکٹ ہیڈ کوارٹر اسپتال منتقل کیا گیا جہاں ملالہ کے سر میں گولی لگنے کی تصدیق ہوگئی۔ کالعدم تحریک طالبان نے ملالہ یوسف زئی پر حملے کی ذمہ داری قبول کرلی ہے۔ اسپتال ذرائع کا کہنا ہے کہ فوری طور پر ملالہ کا آپریشن کیا گیا جس کے بعد اسے ہوش آگیا ہے اور اس نے اپنے والد سے بات بھی کی ہے تاہم بعد میں ملالہ یوسف زئی کو بذریعہ ہیلی کاپٹر پشاور کے سی ایم ایچ اسپتال منتقل کیا گیا۔ پشاور کے سی ایم ایچ اسپتال میں ملالہ یوسف زئی کا اسکین کیا جارہا ہے جس کے بعد ہی ڈاکٹرز کو حتمی رائے قائم کرسکیں گے جبکہ ملالہ یوسف زئی کے آپریشن کے لئے لیڈی ریڈنگ اسپتال سے ڈاکٹروں کی ایک ٹیم بھی طلب کرلی گئی ہے۔ ملالہ یوسف زئی نے سوات آپریشن کے دوران برطانوی میڈیا میں ڈائری لکھ کر سوات کی کشیدہ صورت حال کی منظر کشی کرکے عالمی شہرت حاصل کی تھی۔ اس پر ملالہ کو ستارہ جرات بھی دیا گیا تھا۔