واشنگٹن…سمندری طوفان سینڈی کے باعث امریکا کی 9ریاستوں میں ایمرجنسی نافذ کردی گئی ہے۔ نیویارک میں سمندری طوفان سینڈی کے باعث اقوام متحدہ اور اسٹاک ایکس چینج کے دفاتر بھی بند رہیں گے، 27 سالوں میں پہلی بار اسٹاک ایکس چینج میں کاروبار بند رہے گا، نیویارک ، واشنگٹن اورفلیاڈلفیا میں ٹرانسپورٹ کے سب سے بڑے نظام سب وے اسٹیشنز بھی بند کردیئے گئے ہیں ، جس سے ایک کروڑ سے زائد مسافر متاثر ہوئے ہیں۔جیو نیوز کے نمائندے کے مطابق نیویارک کی سڑکیں سنسان نظر آرہی ہیں اور لوگوں کا اسٹورز پر غیر معمولی رش دیکھنے میں آرہا ہے جو زیادہ سے زیادہ اشیاء ضروریہ خریدنے ،گھروں اور دُکانوں کو محفوظ بنانے میں مصروف دکھائی دیتے ہیں ۔غیرملکی خبرایجنسی کے مطابق سمندری طوفان سینڈی کے باعث امریکی شہر فیلادلفیا میں ٹرانسپورٹ سروس بند کردی گئی۔سمندری طوفان نے امریکی صدارتی انتخاب کی مہم کو بھی متاثر کیا ہے اور امریکی صدر بارک اوباما نے سمندری طوفان کے پیش نظر امریکی ریاست اوہائیو میں نکالی جانے والی انتخابی ریلی منسوخ کردی۔اُدھر امریکی صدر باراک اوباما نے کہا ہے کہسمندری طوفان سینڈی آہستہ آہستہ آگے بڑھ رہا ہے، اُن کا کہناہے کہ سینڈی طوفان کے باعث مزید مشکلات کا سامنا کرنا پڑے گا، سمندری طوفان سینڈی بہت بڑا طوفان ہے، ساحلی علاقوں میں رہنے والے افراد اس معاملے کو سنجیدگی سے لیں۔