18 مارچ ، 2022 
ضابطہ اخلاق کی خلاف ورزی، الیکشن کمیشن نے وزیراعظم کو 21 مارچ کو دوبارہ طلب کرلیا
18 مارچ ، 2022
الیکشن کمیشن نے روکنے کے باوجود سوات کے جلسے میں شرکت کرنے پر وزیراعظم عمران خان کو دوبارہ طلب کرلیا۔
الیکشن کمیشن کے مطابق ضابطہ اخلاق کی خلاف ورزی کے معاملے پر وزیر اعظم خود یا ان کا وکیل ڈسٹرکٹ مانیٹرنگ افسر (ڈی ایم او) کے سامنے پیش نہیں ہوئے۔
الیکشن کمیشن کا کہنا ہے کہ ڈی ایم او سوات نے عمران خان کو 21 مارچ کو دوبارہ طلبی کا نوٹس جاری کیا ہے۔
الیکشن کمیشن کے مطابق وفاقی وزرا مراد سعید، شاہ محمود قریشی اور وزیراعلیٰ خیبرپختونخوا محمودخان کو بھی دوبارہ طلبی کا نوٹس جاری کیا گیا۔
خیال رہے کہ وزیراعظم عمران خان نے 16 مارچ کو سیدو شریف میں جلسہ عام میں شرکت کی تھی اور خطاب بھی کیا تھا۔
الیکشن کمیشن کی جانب سے خیبرپختونخوا کے بلدیاتی انتخابات والے اضلاع میں وزیراعظم عمران خان کو جلسوں میں شرکت سے روکا گیا ہے تاہم اس کے باوجود وہ جلسوں میں شرکت کرتے رہے ہیں۔
