09 اپریل ، 2022 
’آرٹیکل 6 سب پر لگ جائے گا‘: سیکرٹری قومی اسمبلی نے اسپیکر کو ووٹنگ کا مشورہ دے دیا
09 اپریل ، 2022
قومی اسمبلی سیکرٹریٹ کے سیکرٹری اور ایڈیشنل سیکرٹری نے اسپیکر قومی اسمبلی کو آج تحریک عدم اعتماد پر ووٹنگ کا مشورہ دے دیا۔
اسپیکر قومی اسمبلی اسد قیصر کی زیر صدارت قومی اسمبلی سیکرٹریٹ اعلیٰ سطح کا اجلاس جاری ہے جس میں سیکرٹری، ایڈیشنل سیکرٹری لیجسلیشن اور دیگر حکام شریک ہیں۔
ذرائع کے مطابق سیکرٹری، ایڈیشنل سیکرٹری نے اسپیکر قومی اسمبلی کو آج عدم اعتماد پر ووٹنگ کا مشورہ دیا اور کہا کہ سپریم کورٹ کے فیصلے پر عملدرآمد کے علاوہ اسپیکر اور اسمبلی سیکرٹریٹ کے پاس کوئی دوسرا آپشن نہیں۔
سیکرٹری اور ایڈیشنل سیکرٹری نے اسپیکر سے کہا کہ فیصلے پر عملدرآمد نہ کرنے پر آرٹیکل 6 آپ پر ہی نہیں ہم پر بھی لگے گا۔
ذرائع کے مطابق اسپیکر نے ایڈوائس پر افطار کے بعد 8 بجے تحریک عدم اعتماد پر ووٹنگ کا حتمی فیصلہ کرلیا تھا اور قومی اسمبلی سیکرٹریٹ کے عملہ کو ووٹنگ کیلئے تیار رہنے کی ہدایات بھی جاری کردی تھیں۔
ذرائع کا کہنا ہے کہ اسد عمر سمیت دیگر وزرا نے اسپیکر سے ملاقات کرکے دوبارہ ووٹنگ کرانے سے منع کیا اور وزیراعظم عمران خان نے بھی اسد قیصر کو ووٹنگ نہ کرانے کا حکم جاری کیا۔
خیال رہے کہ سپریم کورٹ کے حکم کے مطابق قومی اسمبلی کا اجلاس صبح ساڑھے 10 بجے سے جاری ہے لیکن اب تک اسپیکر کی جانب سے قرارداد پر ووٹنگ کا عمل شروع نہیں کیا گیا اور اب ساڑھے 9 بجے تک کا وقفہ ہے۔
