ریحام نے عمران خان، شاہ محمود اور علی محمد کو بالی وڈ کے ابھرتے ہوئے اداکار قرار دیدیا
10 اپریل ، 2022
پاکستان تحریک انصاف کے چیئرمین عمران خان کی سابق اہلیہ ریحام خان نے عمران خان سمیت پی ٹی آئی رہنماؤں شاہ محمود قریشی اور علی محمد خان کو بالی وڈ کے ابھرتے ہوئے اداکار قرار دیا ہے۔
ریحام خان نے ٹوئٹر پر گزشتہ شب علی محمد خان کی قومی اسمبلی میں تقریر کے بعد پیغام جاری کیا اور طنز کرتے ہوئے لکھا کہ ایک اور بالی وڈکا ابھرتا ہوا اداکار سامنے آرہا ہے۔
انہوں نے اپنی ٹوئٹ میں لکھا کہ عمران خان، شاہ محمود قریشی اور علی محمد خان بالی وڈ میں ٹاپ کے کردار ملنے کے مستحق ہیں۔
اپنی ایک اور ٹوئٹ میں ریحام نے کہا کہ علی محمد خان بہت مزاحیہ ہیں، یہاں تک کہ وہ عمران خان سے بھی زیادہ مزاحیہ ہیں۔
واضح رہے کہ گزشتہ روز سابق وزیر اعظم عمران خان کے خلاف تحریک عدم اعتماد پر ووٹنگ ہوئی اور 174 ارکان نے عدم اعتماد کی قرارداد کے حق میں ووٹ دیا اور یوں عمران خان وزیر اعظم کے عہدے سے برطرف ہوگئے۔
عمران خان کی سابق اہلیہ ریحام خان بھی گزشتہ روز کی کارروائی دیکھنے کے لیے قومی اسمبلی پہنچی تھیں۔
