25 جون ، 2022 
کشمور حملے میں زخمی پولیس افسر کراچی کے اسپتال میں جاں بحق
25 جون ، 2022
سندھ کے ضلع کشمور میں تین ہفتے قبل دو گروپوں میں مسلح تصادم کے دوران فائرنگ سے شدید زخمی ہونے والا پولیس سب انسپکٹر کراچی کے نجی اسپتال میں چل بسا۔
کشمور پولیس کے مطابق 4 جون کو شر اور جکھرانی قبیلوں کے افراد کے مابین کسی معاملے پر مسلح تصادم ہو گیا تھا جس کی اطلاع ملتے ہی پولیس فوری طور پر علاقے میں پہنچی۔
ایس ایس پی کشمور امجد شیخ کے مطابق پولیس کے بر وقت پہنچنے کی وجہ سے تصادم رک گیا تھا تاہم اس دوران فائرنگ کے نتیجے میں پولیس کے سب انسپکٹر نبی بخش سجرانی شدید زخمی ہوئے۔
سب انسپکٹر کو فوری طور پر رحیم یار خان کے اسپتال منتقل کیا گیا تھا، بعد ازاں انہیں ایمبولینس کے ذریعے کراچی کے نجی اسپتال شفٹ کیا گیا۔ علاج کے دوران سب انسپکٹر آج سہ پہر جاں بحق ہوگئے۔
