16 جولائی ، 2022 
کراچی: گھر میں پارک کرنے کیلئے باہر کھڑی اسٹارٹ گاڑی چور لے اڑے
16 جولائی ، 2022
کراچی کے علاقے گلشن اقبال میں نامعلوم ملزمان سابق انسپکٹر جنرل (آئی جی) سندھ کلیم امام کے بھانجے کی گاڑی ان کے گھر کے باہر سے لے اڑے۔
پولیس کے مطابق گلشن اقبال بلاک 4 کے رہائشی عبدالرحمان اپنے گھر کی پارکنگ سے گاڑی نمبر اے ڈبلیو ڈبلیو 350 نکال کر گلی میں اسٹارٹ کھڑی کرکے گھر کے اندر چلے گئے۔
مبینہ ٹاؤن پولیس کے مطابق عبدالرحمان گھر سے دوسری گاڑی نکال رہے تھے جسے وہ اپنے ساتھ لے جانا چاہتے تھے اور پہلے نکالی گئی گاڑی کو اندر کھڑا کرنا تھا کہ موٹرسائیکل پر سوار 2 ملزمان آئے جن میں سے ایک ملزم نے موقع غنیمت جانتے ہوئے گاڑی میں سوار ہوکر گیئر لگایا اور فرار ہوگیا۔
ایس ایچ او مبینہ ٹاؤن کے مطابق واقعے کا مقدمہ عبدالرحمان کی مدعیت میں درج کرلیا گیا ہے اورملزمان کی گرفتاری کیلئے کوششیں کی جا رہی ہیں۔
