18 جولائی ، 2022 
بشریٰ بی بی آڈیو لیک کیس: بظاہر پٹیشنر کو حق دعویٰ حاصل نہیں، اسلام آباد ہائیکورٹ
18 جولائی ، 2022
سابق وزیراعظم عمران خان کی اہلیہ بشریٰ بی بی اور تحریک انصاف کے سوشل میڈیا ہیڈ ارسلان خالدکی آڈیو لیک کی تحقیقات کیلئے دائر کی گئی درخواست پر آج ہونے والی سماعت کا تحریری حکم نامہ جاری کردیا گیا۔
اسلام آباد ہائیکورٹ نے درخواست گزار کے وکیل کو آئندہ سماعت پر درخواست کے قابل سماعت ہونے پر مزید دلائل دینے کی ہدایت کی۔
اسلام آباد ہائیکورٹ کے قائم مقام چیف جسٹس عامر فاروق نے تحریری حکم نامہ جاری کیا جس میں کہا گیا ہے کہ بظاہر معلوم ہوتا ہے کہ پٹیشنرکو حقِ دعوٰی حاصل نہیں۔
عدالت نے کہا کہ پٹیشنر نے حق دعوٰی اور درخواست قابل سماعت ہونے پر دلائل کیلئے مزید مہلت طلب کی لہٰذا پٹیشنر کے وکیل کو قانونی نکتے پر مزید دلائل کیلئے مہلت دی جاتی ہے۔
خیال رہے کہ درخواست گزار نے درخواست میں مؤقف اختیار کیا ہے کہ ایف آئی اے سائبر کرائم ونگ آڈیو لیک کی فارنزک تحقیقات کرے، بشریٰ بی بی اور ارسلان خالد کو بھی عدالت میں بلا کر آڈیو سے متعلق پوچھا جائے۔
درخواست میں مؤقف اختیار کیا گیا ہے کہ آڈیو درست ثابت ہونے کی صورت میں بشریٰ بی بی اور ارسلان خالد کے خلاف سخت کارروائی کی جائے۔
خیال رہے کہ رواں ماہ کے آغاز میں چیئرمین پاکستان تحریک انصاف (پی ٹی آئی) عمران خان کی اہلیہ بشریٰ بی بی کی ایک مبینہ آڈیو لیک ہوئی تھی جس میں وہ عمران خان کے فوکل پرسن برائے ڈیجیٹل میڈیا ارسلان خالد کو مخالفین کے خلاف بیانیہ بنانے اور انہیں غدار ثابت کرنے کی مہم چلانے کی ہدایات دے رہی تھیں۔
