18 نومبر ، 2012 
کراچی: عباس ٹاوٴن میں امام بارگاہ کے قریب دھماکا، 12 افراد زخمی
18 نومبر ، 2012
کراچی … کراچی کے علاقے عباس ٹاوٴن میں امام بارگاہ کے قریب دھماکے میں 12 سے زائد افراد زخمی ہوگئے، کئی عمارتوں کے شیشے ٹوٹ گئے، اسپتالوں میں ایمرجنسی نافذ کردی گئی۔ نمائندہ جیو نیوز افضل ندیم ڈوگر کے مطابق ابوالحسن اصفہانی روڈ پر عباس ٹاوٴن کی امام بارگاہ کے قریب مجلس کے دوران دھماکا ہوا جس میں 12 سے زائد افراد زخمی ہوئے جنہیں ایمبولینسوں کے ذریعے قریبی اسپتال منتقل کردیا گیا۔ ذرائع کے مطابق دھماکے کے بعد علاقے میں شدید فائرنگ کی آوازیں بھی سنی گئیں جس سے خوف و ہراس پھیل گیا جبکہ علاقے میں بجلی کی فراہمی بھی معطل ہوگئی۔ عباس ٹاوٴن میں دھماکے کے بعد قریبی عمارتوں کے شیشے ٹوٹ گئے جبکہ دھماکے کی آواز دور دور تک سنی گئی۔دوسری جانب بم دھماکے کے بعد سول، جناح اور عباسی اسپتال سمیت کراچی کے تمام بڑے اسپتالوں میں ایمرجنسی نافذ کردی گئی ۔ ذرائع کے مطابق دھماکا امام بارگاہ کے قریب کھڑی موٹر سائیکل میں ہوا جس کے نتیجے میں دکانوں اور مکانات کو بھی نقصان پہنچا۔
