01 اگست ، 2022 
حب کینال کی مرمت کا کام مکمل، حب ڈیم سے کراچی کو پانی کی فراہمی شروع
01 اگست ، 2022
کراچی کو حب ڈیم سے پانی سپلائی کرنے والی حب کینال کی مرمت کا کام مکمل کرلیا گیا ہے جس کے بعد کراچی کو پانی کی فراہمی شروع کر دی گئی ہے۔
واٹر بورڈ حکام کے مطابق منگھوپیر کے علاقے میں 24 جولائی کو حب کینال میں شگاف پڑ گیا تھا جس سے کئی غیر آباد علاقے زیرآب آ گئے تھے اور کراچی کو پانی کی فراہمی معطل ہوگئی تھی۔
واٹر بورڈ حکام نے حب کینال سے کراچی کو پانی کی سپلائی بند کی تو شگاف بھرنے اور کینال کی مرمت کا کام ہنگامی بنیادوں پر شروع ہوا جس میں لگ بھگ آٹھ دن لگے۔
واپڈا حکام کے مطابق واٹر بورڈ کی کلیئرنس کے بعد پیر کی دوپہر حب ڈیم سے کراچی کی کینال میں 20 ایم جی ڈی پانی کی فراہمی شروع کی گئی جو مرحلہ وار بڑھائی جا رہی ہے۔
حکام کے مطابق پیر کی رات تک کراچی کو پانی کی سپلائی بتدریج 80 ایم جی ڈی تک پہنچ جائے گی۔
واضح رہے کہ حب ڈیم سے کراچی کو حب کینال کے راستے تقریباً 100 ملین گیلن پانی یومیہ فراہم کیا جاتا ہے۔
