14 اکتوبر ، 2022 
کراچی: صدر میں کلینک پر حملہ کرنے والا کالعدم تنظیم کا ملزم گرفتار
14 اکتوبر ، 2022
سکیورٹی اداروں نے کارروائی کرتے ہوئے 28 ستمبر کو کراچی کے علاقے صدر میں دانتوں کے کلینک پر فائرنگ کرنے والے اہم ملزم کو گرفتار کر لیا۔
ذرائع کا دعویٰ ہے کہ گرفتار ملزم کا تعلق کالعدم تنظیم سے ہے، ملزم کے قبضے سے واقعے میں استعمال ہونے والا پستول بھی برآمد کرلیا گیا ہے۔
ذرائع کے مطابق گرفتار ملزم نے کلینک میں داخل ہوکر فائرنگ کی تھی جس میں ایک شخص جاں بحق اور دو زخمی ہوئے تھے، ملزم قائد آباد کے علاقے میں روپوش تھا۔
ذرائع کے مطابق دہشتگردی کا ٹاسک ایس آر اے کی کمانڈ کی جانب سے دیا گیا تھا۔
دوسری جانب سی ٹی ڈی حکام کے ساتھ پریس کانفرنس میں صوبائی وزیر شرجیل میمن نے بتایا کہ کاؤنٹر ٹیررازم ڈیپارٹمنٹ اور حساس اداروں کے مشترکہ آپریشن سے صدر واقعہ کا ملزم گرفتار ہوا، سی ٹی ڈی اور حساس اداروں نے سی سی ٹی وی فوٹیج اور دیگر جدید ٹیکنالوجی کی مدد سے ملزمان کو گرفتار کیا۔
انہوں نے بتایا کہ ملزم کی گرفتاری کیلئے لگ بھگ 100 سے زائد کیمروں کی مدد لی گئی، گرفتار ملزم وقار خشک کو واردات میں استعمال ہونے والی موٹر سائیکل اور اسلحہ سمیت گرفتار کیا گیا۔
